ਕੈਲੀਫ਼ੋਰਨੀਆ ਵਿੱਚ ਮਜ਼ਾਕ-ਮਸਤੀ ਦੌਰਾਨ ਪੁਲਿਸ ਅਧਿਕਾਰੀ ਨੂੰ ਸਾਥੀ ਅਧਿਕਾਰੀ ਦੀ ਗੋਲੀ ਲੱਗੀ
ਕੈਲੀਫ਼ੋਰਨੀਆ ਵਿੱਚ ਮਜ਼ਾਕ-ਮਸਤੀ ਦੌਰਾਨ ਪੁਲਿਸ ਅਧਿਕਾਰੀ ਨੂੰ ਸਾਥੀ ਅਧਿਕਾਰੀ ਦੀ ਗੋਲੀ ਲੱਗੀ
ਪਾਸਾਡੀਨਾ, ਕੈਲੀਫ਼ੋਰਨੀਆ (ਪੰਜਾਬੀ ਪਹਿਚਾਣ )ਪਾਸਾਡੀਨਾ ਕੈਲੀਫ਼ੋਰਨੀਆਹਾਲ ਹੀ ਵਿੱਚ ਜਾਰੀ
ਕੀਤੀ ਗਈ ਡੈਸ਼ਕੈਮ ਵੀਡੀਓ ਵਿੱਚ ਦਿਖਾਇਆ ਗਿਆ ਹੈ ਕਿ ਪਾਸਾਡੀਨਾ ਪੁਲਿਸ ਵਿਭਾਗ ਦਾ ਇੱਕ ਅਧਿਕਾਰੀ
ਆਪਣੇ ਹੀ ਸਾਥੀ ਅਧਿਕਾਰੀ ਦੀ ਗੋਲੀ ਨਾਲ ਜ਼ਖ਼ਮੀ ਹੋ ਗਿਆ। ਪੁਲਿਸ ਮੁਖੀ ਨੇ ਇਸ ਘਟਨਾ ਨੂੰ
“ਮਜ਼ਾਕ-ਮਸਤੀ (Horseplay)” ਦੌਰਾਨ ਵਾਪਰੀ ਘਟਨਾ ਕਰਾਰ ਦਿੱਤਾ ਹੈ।
ਵੀਡੀਓ, ਜੋ ਪੁਲਿਸ ਦੇ ਪਾਰਕਿੰਗ ਗੈਰਾਜ ਅੰਦਰੋਂ ਰਿਕਾਰਡ ਕੀਤੀ ਗਈ ਸੀ, ਵਿੱਚ ਇੱਕ
ਪੈਟਰੋਲ ਕਾਰ ਨੂੰ ਦੋ ਅਧਿਕਾਰੀਆਂ ਦੇ ਨੇੜੇ ਰੁਕਦਿਆਂ ਦੇਖਿਆ ਜਾ ਸਕਦਾ ਹੈ। ਇੱਕ ਅਧਿਕਾਰੀ ਅਚਾਨਕ
ਆਪਣੀ ਬੰਦੂਕ ਕੱਢ ਕੇ ਪੈਟਰੋਲ ਕਾਰ ਵਿੱਚ ਬੈਠੇ ਅਧਿਕਾਰੀ ਵੱਲ ਤਾਣਦਾ ਹੈ ਅਤੇ ਕੁਝ ਸਕਿੰਟਾਂ ਬਾਅਦ
ਉਸ ਨੂੰ ਮੁੜ ਹੋਲਸਟਰ ਵਿੱਚ ਰੱਖ ਲੈਂਦਾ ਹੈ।
ਵੀਡੀਓ ਵਿੱਚ ਅਗਲੀ ਘਟਨਾ ਨਹੀਂ ਦਿਖਾਈ ਦਿੰਦੀ, ਪਰ ਪੁਲਿਸ
ਮੁਖੀ ਅਨੁਸਾਰ ਕਾਰ ਵਿੱਚ ਬੈਠੇ ਅਧਿਕਾਰੀ ਨੇ ਵੀ ਆਪਣੀ ਬੰਦੂਕ ਕੱਢੀ, ਜੋ ਅਚਾਨਕ
ਚੱਲ ਗਈ। ਗੋਲੀ ਕਾਰ ਦੀ ਵਿੰਡਸ਼ੀਲਡ ਵਿੱਚੋਂ ਲੰਘਦੀ ਹੋਈ ਬਾਹਰ ਖੜ੍ਹੇ ਅਧਿਕਾਰੀ ਦੇ ਮੋਢੇ ਵਿੱਚ
ਲੱਗੀ।
ਇਹ ਘਟਨਾ ਪਿਛਲੇ ਸਾਲ ਸਤੰਬਰ ਵਿੱਚ ਵਾਪਰੀ ਸੀ, ਪਰ ਵਿਭਾਗ
ਵੱਲੋਂ ਇਸ ਦੀ ਵੀਡੀਓ ਬੁੱਧਵਾਰ ਨੂੰ ਜਨਤਕ ਕੀਤੀ ਗਈ।
ਪੁਲਿਸ ਮੁਖੀ ਨੇ ਦੱਸਿਆ ਕਿ ਗੋਲੀ ਲੱਗਣ ਵਾਲਾ ਅਧਿਕਾਰੀ ਹੁਣ ਪੂਰੀ ਤਰ੍ਹਾਂ ਠੀਕ
ਹੋ ਚੁੱਕਾ ਹੈ ਅਤੇ ਇਸ ਮਾਮਲੇ ਵਿੱਚ ਸੰਬੰਧਿਤ ਅਧਿਕਾਰੀਆਂ ਖ਼ਿਲਾਫ਼ ਵਿਭਾਗੀ ਕਾਰਵਾਈ ਕੀਤੀ ਗਈ
ਹੈ।
Police Officer Accidentally Shot
