ਕੈਨੇਡਾ ਵਿੱਚ ਸਾਲ ਭਰ ਗਰਮੀਆਂ ਵਾਲਾ ਸਮਾਂ ਲਾਗੂ ਕਰਨ ਨਾਲ ਸਿਹਤ ਨੂੰ ਹੋ ਸਕਦਾ ਹੈ ਖ਼ਤਰਾ
Punjabi Pehchan / ਓਟਵਾ: ਕੈਨੇਡਾ
ਨੀਂਦ ਦੀ ਕਮੀ, ਦਿਲ ਦੀਆਂ ਬਿਮਾਰੀਆਂ, ਸ਼ੂਗਰ ਅਤੇ ਮੋਟਾਪੇ ਦਾ ਖ਼ਤਰਾ ਵਧ ਸਕਦਾ ਹੈ
ਇਸ ਦਾ ਅਸਰ ਖ਼ਾਸ ਤੌਰ ’ਤੇ ਬੱਚਿਆਂ ਅਤੇ ਨੌਜਵਾਨਾਂ ’ਤੇ ਪੈ ਸਕਦਾ ਹੈ।
ਓਟਵਾ: ਕੈਨੇਡਾ ਦੇ ਕਈ ਪ੍ਰੋਵਿੰਸਾਂ ਵੱਲੋਂ ਸਾਲ ਭਰ ਗਰਮੀਆਂ ਵਾਲਾ ਸਮਾਂ ਲਾਗੂ ਕਰਨ ਦੀਆਂ ਤਿਆਰੀਆਂ ਦਰਮਿਆਨ ਮਾਹਿਰਾਂ ਨੇ ਲੋਕਾਂ ਦੀ ਸਿਹਤ ’ਤੇ ਪੈਣ ਵਾਲੇ ਮਾੜੇ ਪ੍ਰਭਾਵਾਂ ਬਾਰੇ ਚਿਤਾਵਨੀ ਦਿੱਤੀ ਹੈ। ਮਾਹਿਰਾਂ ਅਨੁਸਾਰ ਸਾਲ ਭਰ ਘੜੀਆਂ ਇੱਕ ਘੰਟਾ ਅੱਗੇ ਰੱਖਣ ਨਾਲ ਸਰੀਰ ਦੀ ਕੁਦਰਤੀ ਜੈਵਿਕ ਘੜੀ ਪ੍ਰਭਾਵਿਤ ਹੋ ਸਕਦੀ ਹੈ। ਇਸ ਕਾਰਨ ਨੀਂਦ ਦੀ ਕਮੀ, ਦਿਲ ਦੀਆਂ ਬਿਮਾਰੀਆਂ, ਸ਼ੂਗਰ ਅਤੇ ਮੋਟਾਪੇ ਦਾ ਖ਼ਤਰਾ ਵਧ ਸਕਦਾ ਹੈ।
ਯੌਰਕ ਯੂਨੀਵਰਸਿਟੀ ਦੀ ਪ੍ਰੋਫੈਸਰ ਪੈਟ੍ਰਿਸ਼ੀਆ ਲੈਕਿਨ-ਥਾਮਸ ਨੇ ਕਿਹਾ ਕਿ ਸਵੇਰ ਦੀ ਧੁੱਪ ਸਰੀਰ ਦੀ ਜੈਵਿਕ ਘੜੀ ਨੂੰ ਸਹੀ ਰੱਖਣ ਲਈ ਬਹੁਤ ਜ਼ਰੂਰੀ ਹੈ। ਸਾਲ ਭਰ ਗਰਮੀਆਂ ਵਾਲਾ ਸਮਾਂ ਲਾਗੂ ਰਹਿਣ ਨਾਲ ਲੋਕਾਂ ਨੂੰ ਸਵੇਰੇ ਘੱਟ ਰੌਸ਼ਨੀ ਮਿਲੇਗੀ ਅਤੇ ਸ਼ਾਮ ਨੂੰ ਵਧੇਰੇ ਰੌਸ਼ਨੀ ਮਿਲੇਗੀ।
ਸਾਈਮਨ ਫਰੇਜ਼ਰ ਯੂਨੀਵਰਸਿਟੀ ਦੇ ਮਾਹਿਰ ਰਾਲਫ਼ ਮਿਸਟਲਬਰਗਰ ਨੇ ਵੀ ਕਿਹਾ ਕਿ ਇਸ ਤਬਦੀਲੀ ਨਾਲ ਨੀਂਦ ਅਤੇ ਕੰਮਕਾਜ ਦੇ ਸਮੇਂ ਵਿਚਕਾਰ ਤਾਲਮੇਲ ਵਿਗੜ ਸਕਦਾ ਹੈ। ਇਸ ਦਾ ਅਸਰ ਖ਼ਾਸ ਤੌਰ ’ਤੇ ਬੱਚਿਆਂ ਅਤੇ ਨੌਜਵਾਨਾਂ ’ਤੇ ਪੈ ਸਕਦਾ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਸਾਲ ਵਿੱਚ ਦੋ ਵਾਰ ਸਮਾਂ ਬਦਲਣ ਦੀ ਬਜਾਏ ਸਾਰਾ ਸਾਲ ਸਰਦੀਆਂ ਵਾਲਾ ਮਿਆਰੀ ਸਮਾਂ ਲਾਗੂ ਰੱਖਣਾ ਸਿਹਤ ਲਈ ਵਧੇਰੇ ਲਾਹੇਵੰਦ ਹੋ ਸਕਦਾ ਹੈ।
Implementing Year round Summer Time In Canada Could Pose A Health Risk
