ਫਰਿਜ਼ਨੋ ਵਿੱਚ ਬਜ਼ੁਰਗ ਅਤੇ ਧੀ ’ਤੇ ਹਮਲੇ ਦੇ ਦੋਸ਼ ਹੇਠ ਡਿਊਟੀ ਤੋਂ ਬਾਹਰ ਆਈਸ ਏਜੰਟ ਗ੍ਰਿਫ਼ਤਾਰ
Punjabi Pehchan / Frenso ,CA
72 ਸਾਲਾ ਵਿਅਕਤੀ ਵੱਲੋਂ ਚਲਾਈ ਗੋਲੀ ਨਾਲ ਏਜੰਟ ਜ਼ਖ਼ਮੀ; ਬਜ਼ੁਰਗ ਖ਼ਿਲਾਫ਼ ਕੋਈ ਦੋਸ਼ ਨਹੀਂ
ਫਰਿਜ਼ਨੋ ਕੈਲੀਫੋਰਨੀਆ — ਘਰ ਦੇ ਅਗਲੇ ਲਾਅਨ ਵਿੱਚ ਸੁੱਤੇ ਮਿਲੇ ਅਮਰੀਕੀ ਇਮੀਗ੍ਰੇਸ਼ਨ ਅਤੇ ਕਸਟਮਜ਼ ਐਨਫੋਰਸਮੈਂਟ (ਆਈਸ) ਦੇ ਇੱਕ ਏਜੰਟ ਨੂੰ 72 ਸਾਲਾ ਵਿਅਕਤੀ ਅਤੇ ਉਸ ਦੀ ਧੀ ’ਤੇ ਕਥਿਤ ਹਮਲੇ ਤੋਂ ਬਾਅਦ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁਲਿਸ ਮੁਤਾਬਕ, ਝਗੜੇ ਦੌਰਾਨ ਬਜ਼ੁਰਗ ਵੱਲੋਂ ਚਲਾਈ ਗੋਲੀ ਨਾਲ ਏਜੰਟ ਜ਼ਖ਼ਮੀ ਹੋ ਗਿਆ। ਉਸ ਦੀ ਪਛਾਣ ਟੈਕਸਸ ਦੇ 32 ਸਾਲਾ ਡੇਵਿਡ ਗੋਂਜ਼ਾਲੇਜ਼ ਵਜੋਂ ਹੋਈ ਹੈ। ਘਟਨਾ ਸਮੇਂ ਉਹ ਡਿਊਟੀ ’ਤੇ ਨਹੀਂ ਸੀ।
ਘਟਨਾ ਸ਼ੁੱਕਰਵਾਰ, 9 ਅਕਤੂਬਰ ਨੂੰ ਤੜਕੇ ਵਾਪਰੀ। ਫਰਿਜ਼ਨੋ ਪੁਲਿਸ ਅਨੁਸਾਰ, ਘਰ ਪਰਤੀ ਇੱਕ ਔਰਤ ਨੇ ਗੋਂਜ਼ਾਲੇਜ਼ ਨੂੰ ਆਪਣੇ ਲਾਅਨ ਵਿੱਚ ਸੁੱਤਾ ਦੇਖਿਆ ਅਤੇ ਆਪਣੇ ਪਿਤਾ ਨੂੰ ਦੱਸਿਆ। ਜਦੋਂ ਪਿਤਾ ਨੇ ਬਾਹਰ ਆ ਕੇ ਉਸ ਨੂੰ ਉੱਥੋਂ ਜਾਣ ਲਈ ਕਿਹਾ ਤਾਂ ਜਾਗਣ ਮਗਰੋਂ ਉਹ ਕਥਿਤ ਤੌਰ ’ਤੇ ਹਮਲਾਵਰ ਹੋ ਗਿਆ। ਪੁਲਿਸ ਨੇ ਦੱਸਿਆ ਕਿ ਉਹ ਨਸ਼ੇ ਵਿੱਚ ਦਿਖਾਈ ਦੇ ਰਿਹਾ ਸੀ।
ਪੁਲਿਸ ਦਾ ਦੋਸ਼ ਹੈ ਕਿ ਗੋਂਜ਼ਾਲੇਜ਼ ਨੇ ਪਹਿਲਾਂ ਬਜ਼ੁਰਗ ’ਤੇ ਹਮਲਾ ਕੀਤਾ ਅਤੇ ਜਦੋਂ ਧੀ ਆਪਣੇ ਪਿਤਾ ਨੂੰ ਬਚਾਉਣ ਲਈ ਅੱਗੇ ਆਈ ਤਾਂ ਉਸ ’ਤੇ ਵੀ ਹਮਲਾ ਕੀਤਾ। ਆਪਣੀ ਅਤੇ ਧੀ ਦੀ ਸੁਰੱਖਿਆ ਨੂੰ ਖ਼ਤਰਾ ਮਹਿਸੂਸ ਕਰਦਿਆਂ ਬਜ਼ੁਰਗ ਨੇ ਇੱਕ ਗੋਲੀ ਚਲਾਈ, ਜੋ ਗੋਂਜ਼ਾਲੇਜ਼ ਦੇ ਧੜ ਵਿੱਚ ਲੱਗੀ। ਔਰਤ ਦਾ ਸਾਥੀ, ਜੋ ਡਿਊਟੀ ਤੋਂ ਬਾਹਰ ਪੁਲਿਸ ਅਧਿਕਾਰੀ ਸੀ, ਮੌਕੇ ’ਤੇ ਪਹੁੰਚਿਆ ਅਤੇ ਉਸ ਨੇ ਗੋਂਜ਼ਾਲੇਜ਼ ਨੂੰ ਹੱਥਕੜੀਆਂ ਲਗਾ ਦਿੱਤੀਆਂ।
ਜ਼ਖ਼ਮੀ ਏਜੰਟ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਹ ਗੰਭੀਰ ਹਮਲੇ ਦੇ ਦੋਸ਼ਾਂ ਹੇਠ ਪੁਲਿਸ ਹਿਰਾਸਤ ਵਿੱਚ ਹੈ। ਪੁਲਿਸ ਅਨੁਸਾਰ, ਬਜ਼ੁਰਗ ਕੋਲ ਹਥਿਆਰ ਕਾਨੂੰਨੀ ਤੌਰ ’ਤੇ ਸੀ ਅਤੇ ਜਾਂਚ ਵਿੱਚ ਸਾਹਮਣੇ ਆਈ ਜਾਣਕਾਰੀ ਦੇ ਆਧਾਰ ’ਤੇ ਉਸ ਖ਼ਿਲਾਫ਼ ਕੋਈ ਅਪਰਾਧਿਕ ਦੋਸ਼ ਨਹੀਂ ਲਗਾਇਆ ਗਿਆ। ਗੋਂਜ਼ਾਲੇਜ਼ ਉਸ ਇਲਾਕੇ ਵਿੱਚ ਕਿਉਂ ਸੀ, ਇਸ ਦੀ ਜਾਂਚ ਜਾਰੀ ਹੈ।
Fresno ICE Agent David Gonzalez Fresno Shooting Off duty ICE Agent Arrested California Punjabi News Punjabi Pehchan
