ਟਰੰਪ ਨੇ ਕੈਨੇਡਾ ਦੇ ਕੁਝ ਸਾਮਾਨ ’ਤੇ 50 ਫ਼ੀ ਸਦੀ ਟੈਰਿਫ਼ ਹਟਾਉਣ ਦਾ ਕੀਤਾ ਐਲਾਨ
Punjabi Pehchan / Washington
ਸਮੁੰਦਰੀ ਘਾਹ, ਪੈਕਿੰਗ ਵਾਲੇ ਡੱਬਿਆਂ ਅਤੇ ਪਲਾਈਵੁੱਡ ਦੀਆਂ ਕੁਝ ਕਿਸਮਾਂ ਨੂੰ ਟੈਰਿਫ਼ ਤੋਂ ਛੋਟ
ਟੈਰਿਫ਼ ਨੀਤੀ ਵਾਪਸ ਲੈਣ ਦੀ ਬਜਾਏ ਸਿਰਫ਼ ਕੁਝ ਉਤਪਾਦਾਂ ਨੂੰ ਰਾਹਤ ਦੇਣ ਤੱਕ ਸੀਮਤ
ਵਾਸ਼ਿੰਗਟਨ, ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਕੈਨੇਡਾ ਤੋਂ ਆਉਣ ਵਾਲੇ ਕੁਝ ਸਾਮਾਨ ’ਤੇ ਲੱਗੇ 50 ਫ਼ੀ ਸਦੀ ਟੈਰਿਫ਼ ਹਟਾਉਣ ਦਾ ਫ਼ੈਸਲਾ ਕੀਤਾ ਹੈ। ਇਸ ਦੇ ਨਾਲ ਹੀ ਕੁਝ ਹੋਰ ਉਤਪਾਦਾਂ ਨੂੰ ਟੈਰਿਫ਼ ਦੀ ਸੂਚੀ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਇਹ ਤਬਦੀਲੀਆਂ ਅਕਤੂਬਰ ਦੇ ਅੰਤ ਤੋਂ ਲਾਗੂ ਹੋਣਗੀਆਂ।
ਨਵੀਂ ਨੀਤੀ ਤਹਿਤ ਸਮੁੰਦਰੀ ਘਾਹ, ਪੈਕਿੰਗ ਵਾਲੇ ਡੱਬਿਆਂ ਅਤੇ ਪਲਾਈਵੁੱਡ ਦੀਆਂ ਕੁਝ ਕਿਸਮਾਂ ਨੂੰ ਟੈਰਿਫ਼ ਤੋਂ ਛੋਟ ਮਿਲੇਗੀ। ਦੂਜੇ ਪਾਸੇ, ਕੋਕੋ ਪਾਊਡਰ, ਵਿਨਾਇਲ ਫ਼ਰਸ਼ ਅਤੇ ਸ਼ੈਂਪੂ ਵਰਗੇ ਉਤਪਾਦਾਂ ’ਤੇ ਟੈਰਿਫ਼ ਲਗਾਇਆ ਜਾਵੇਗਾ। ਅਮਰੀਕਾ ਦੇ ਮੇਨ ਸੂਬੇ ਦੀ ਰਿਪਬਲਿਕਨ ਸੈਨੇਟਰ ਸੂਜ਼ਨ ਕੋਲਿਨਜ਼ ਨੇ ਇਨ੍ਹਾਂ ਛੋਟਾਂ ਲਈ ਕੋਸ਼ਿਸ਼ ਕੀਤੀ ਸੀ।
ਉਨ੍ਹਾਂ ਦਾ ਕਹਿਣਾ ਹੈ ਕਿ ਕਈ ਕਿਸਾਨ ਅਤੇ ਉਤਪਾਦਕ ਕੈਨੇਡਾ ਤੋਂ ਆਉਣ ਵਾਲੇ ਸਾਮਾਨ ਅਤੇ ਪੈਕਿੰਗ ਸਮੱਗਰੀ ’ਤੇ ਨਿਰਭਰ ਹਨ। ਟੈਰਿਫ਼ ਹਟਣ ਨਾਲ ਉਨ੍ਹਾਂ ਨੂੰ ਰਾਹਤ ਮਿਲ ਸਕਦੀ ਹੈ। ਉੱਧਰ, ਟਰੰਪ ਨੇ ਕਿਹਾ ਹੈ ਕਿ ਕੈਨੇਡਾ ਨਾਲ ਵਪਾਰ ਸਮਝੌਤਾ ਜਲਦੀ ਹੋ ਸਕਦਾ ਹੈ। ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਵੀ ਕਿਹਾ ਹੈ ਕਿ ਉਨ੍ਹਾਂ ਦਾ ਦੇਸ਼ ਆਪਸੀ ਹਿੱਤਾਂ ’ਤੇ ਆਧਾਰਿਤ ਸਮਝੌਤੇ ਲਈ ਤਿਆਰ ਹੈ।
ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਕਦਮ ਪੂਰੀ ਤਰ੍ਹਾਂ ਟੈਰਿਫ਼ ਨੀਤੀ ਵਾਪਸ ਲੈਣ ਦੀ ਬਜਾਏ ਸਿਰਫ਼ ਕੁਝ ਉਤਪਾਦਾਂ ਨੂੰ ਰਾਹਤ ਦੇਣ ਤੱਕ ਸੀਮਤ ਹੈ। ਇਸ ਲਈ ਦੋਵਾਂ ਦੇਸ਼ਾਂ ਵਿਚਾਲੇ ਵਪਾਰਕ ਤਣਾਅ ਖ਼ਤਮ ਹੋਣ ਦੀ ਸੰਭਾਵਨਾ ਹਾਲੇ ਸਪੱਸ਼ਟ ਨਹੀਂ ਹੈ।
Trump Announced The Removal Of A 50 Percent Tariff On Certain Canadian Goods
