ਕਿਊਬੈਕ ਵਿੱਚ ‘ਯੂਐਸ ਆਰਮੀ’ ਲਿਖਿਆ ਰਹੱਸਮਈ ਡਰੱਮ ਮਿਲਿਆ,
Punjabi Pehchan / ਮਾਂਟਰੀਅਲ:canada
ਜ਼ਹਿਰੀਲੇ ਪਦਾਰਥ ਹੋਣ ਦਾ ਖ਼ਦਸ਼ਾ
ਕੈਨੇਡਾ ਅਤੇ ਯੂਰਪੀ ਯੂਨੀਅਨ ਵਿਚਾਲੇ ਮਜ਼ਬੂਤ ਹੋਣਗੇ ਸਬੰਧ
ਮਾਂਟਰੀਅਲ: ਕਿਊਬੈਕ ਵਿੱਚ ‘ਯੂਐਸ ਆਰਮੀ’ ਲਿਖਿਆ ਇੱਕ ਰਹੱਸਮਈ ਡਰੱਮ ਮਿਲਣ ਤੋਂ ਬਾਅਦ ਸੁਰੱਖਿਆ ਏਜੰਸੀਆਂ ਵਿੱਚ ਚਿੰਤਾ ਵਧ ਗਈ ਹੈ। ਅਧਿਕਾਰੀਆਂ ਨੂੰ ਖ਼ਦਸ਼ਾ ਹੈ ਕਿ ਇਸ ਵਿੱਚ ਜਾਨਲੇਵਾ ਜ਼ਹਿਰੀਲੇ ਪਦਾਰਥ ਹੋ ਸਕਦੇ ਹਨ।
ਡਰੱਮ ਵਿੱਚ ਮੌਜੂਦ ਪਦਾਰਥ ਦੇ ਨਮੂਨੇ ਜਾਂਚ ਲਈ ਅਲਬਰਟਾ ਦੀ ਵਿਸ਼ੇਸ਼ ਫੌਜੀ ਲੈਬਾਰਟਰੀ ਭੇਜੇ ਗਏ ਹਨ, ਜਿਨ੍ਹਾਂ ਦੇ ਨਤੀਜੇ ਅਗਲੇ ਹਫ਼ਤੇ ਆਉਣ ਦੀ ਉਮੀਦ ਹੈ। ਇਹ ਡਰੱਮ ਸੇਂਟ ਲਾਰੈਂਸ ਦਰਿਆ ਵਿੱਚ ਸਥਿਤ ਗ੍ਰੋਸ-ਈਲ ਟਾਪੂ ’ਤੇ ਇੱਕ ਸਥਾਨਕ ਨਾਗਰਿਕ ਨੂੰ ਮਿਲਿਆ ਸੀ। ਇਸ ’ਤੇ ਦਰਜ ਤਾਰੀਖ਼ਾਂ ਤੋਂ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਇਹ ਦੂਜੇ ਵਿਸ਼ਵ ਯੁੱਧ ਦੇ ਸਮੇਂ ਦਾ ਹੋ ਸਕਦਾ ਹੈ।
ਜਾਂਚ ਦੌਰਾਨ ਦੂਜੇ ਵਿਸ਼ਵ ਯੁੱਧ ਦੇ ਇੱਕ ਗੁਪਤ ਫੌਜੀ ਪ੍ਰੋਜੈਕਟ ਨਾਲ ਇਸ ਦੇ ਸੰਭਾਵਿਤ ਸਬੰਧਾਂ ਬਾਰੇ ਵੀ ਸਵਾਲ ਉੱਠ ਰਹੇ ਹਨ। ਖੋਜਕਰਤਾਵਾਂ ਮੁਤਾਬਕ 1942 ਤੋਂ 1944 ਦਰਮਿਆਨ ਕੈਨੇਡਾ, ਬ੍ਰਿਟੇਨ ਅਤੇ ਅਮਰੀਕਾ ਦੇ ਵਿਗਿਆਨੀਆਂ ਨੇ ਐਂਥ੍ਰੈਕਸ ਬੰਬ ਬਣਾਉਣ ਦੇ ਪ੍ਰੋਜੈਕਟ ’ਤੇ ਕੰਮ ਕੀਤਾ ਸੀ। ਹਾਲਾਂਕਿ ਮਿਲੇ ਡਰੱਮ ਦਾ ਇਸ ਪ੍ਰੋਜੈਕਟ ਨਾਲ ਸਬੰਧ ਅਜੇ ਸਾਬਤ ਨਹੀਂ ਹੋਇਆ।
ਕਿਊਬੈਕ ਪੁਲਿਸ ਨੇ ਇਲਾਕੇ ਨੂੰ ਘੇਰੇ ਵਿੱਚ ਲੈ ਕੇ 24 ਘੰਟੇ ਨਿਗਰਾਨੀ ਸ਼ੁਰੂ ਕਰ ਦਿੱਤੀ ਹੈ। ਡਰੱਮ ਨੂੰ ਨੇੜਲੇ ਸੁਰੱਖਿਅਤ ਸਥਾਨ ’ਤੇ ਲਿਜਾਇਆ ਗਿਆ ਹੈ। ਕੈਨੇਡੀਅਨ ਫੌਜ ਦੇ ਸਾਬਕਾ ਅਧਿਕਾਰੀ ਮੁਤਾਬਕ ਜੇਕਰ ਇਸ ਵਿੱਚ ਤੰਤੂ-ਜ਼ਹਿਰ ਹੋਇਆ, ਤਾਂ ਇਹ ਮਨੁੱਖੀ ਜੀਵਨ ਲਈ ਬੇਹੱਦ ਖ਼ਤਰਨਾਕ ਹੋ ਸਕਦਾ ਹੈ। ਫਿਲਹਾਲ ਜਾਂਚ ਰਿਪੋਰਟ ਦੀ ਉਡੀਕ ਕੀਤੀ ਜਾ ਰਹੀ ਹੈ ਅਤੇ ਅਧਿਕਾਰੀਆਂ ਵੱਲੋਂ ਪਦਾਰਥ ਦੀ ਅਸਲ ਪਛਾਣ ਬਾਰੇ ਕੋਈ ਪੁਸ਼ਟੀ ਨਹੀਂ ਕੀਤੀ ਗਈ।
ਕੈਨੇਡਾ ਅਤੇ ਯੂਰਪੀ ਯੂਨੀਅਨ ਵਿਚਾਲੇ ਮਜ਼ਬੂਤ ਹੋਣਗੇ ਸਬੰਧ
ਮਾਂਟਰੀਅਲ: ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਯੂਰਪੀ ਕਮਿਸ਼ਨ ਦੀ ਪ੍ਰਧਾਨ ਉਰਸੁਲਾ ਵੌਨ ਡੇਰ ਲੇਅਨ ਨੇ ਕੈਨੇਡਾ ਅਤੇ ਯੂਰਪੀ ਯੂਨੀਅਨ ਵਿਚਾਲੇ ਸਬੰਧ ਹੋਰ ਮਜ਼ਬੂਤ ਕਰਨ ਲਈ ਨਵੀਂ ਸਾਂਝੇਦਾਰੀ ਦਾ ਸੰਕੇਤ ਦਿੱਤਾ ਹੈ।
ਮਾਂਟਰੀਅਲ ਵਿੱਚ ਦੋ ਦਿਨਾਂ ਦੇ ਸੰਮੇਲਨ ਦੇ ਪਹਿਲੇ ਦਿਨ ਦੋਵਾਂ ਆਗੂਆਂ ਨੇ ਏਆਈ ਸਮੇਤ ਕਈ ਖੇਤਰਾਂ ਵਿੱਚ ਮਿਲ ਕੇ ਕੰਮ ਕਰਨ ਦੀ ਗੱਲ ਕਹੀ। ਇਸ ਦੌਰਾਨ ‘ਸਹਿਯੋਗੀ ਮੈਂਬਰ’ ਦਾ ਦਰਜਾ ਦੇਣ ਬਾਰੇ ਵੀ ਚਰਚਾ ਹੋਈ।
ਵੌਨ ਡੇਰ ਲੇਅਨ ਨੇ ਪਿਛਲੇ ਮਹੀਨੇ ਹੀ ਕਾਰਨੀ ਨੂੰ ਕੈਨੇਡਾ ਅਤੇ ਯੂਰਪੀ ਯੂਨੀਅਨ ਦੇ ਰਿਸ਼ਤੇ ਹੋਰ ਡੂੰਘੇ ਕਰਨ ਦਾ ਸੱਦਾ ਦਿੱਤਾ ਸੀ। ਹਾਲਾਂਕਿ ਇਸ ਪ੍ਰਸਤਾਵਿਤ ਦਰਜੇ ਨੂੰ ਲੈ ਕੇ ਕੁਝ ਦੇਸ਼ਾਂ ਵੱਲੋਂ ਇਤਰਾਜ਼ ਵੀ ਸਾਹਮਣੇ ਆਏ ਹਨ।
ਅਮਰੀਕਾ ਨਾਲ ਚੱਲ ਰਹੇ ਵਪਾਰਕ ਤਣਾਅ ਦਰਮਿਆਨ ਕਾਰਨੀ ਹੋਰ ਵਿਸ਼ਵ ਸ਼ਕਤੀਆਂ ਅਤੇ ਸਾਂਝੇਦਾਰਾਂ ਨਾਲ ਸਬੰਧ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਇਸ ਸੰਮੇਲਨ ਨੂੰ ਕੈਨੇਡਾ ਅਤੇ ਯੂਰਪੀ ਯੂਨੀਅਨ ਵਿਚਾਲੇ ਭਵਿੱਖੀ ਸਹਿਯੋਗ ਲਈ ਅਹਿਮ ਮੰਨਿਆ ਜਾ ਰਿਹਾ ਹੈ।
Mysterious drum labeled us army found in quebec
