ਸਪੋਕੇਨ ਸਿੱਖ ਟੈਂਪਲ ਵੱਲੋਂ ਜੰਗਲੀ ਅੱਗ ਪ੍ਰਭਾਵਿਤ ਪਰਿਵਾਰਾਂ ਲਈ 30 ਹਜ਼ਾਰ ਡਾਲਰ ਦੀ ਮਦਦ
ਗੁਰਪ੍ਰੀਤ ਸਿੰਘ ਧੰਜੂ / Spokane,wa
ਸਪੋਕੇਨ, ਵਾਸ਼ਿੰਗਟਨ-ਸਪੋਕੇਨ ਇਲਾਕੇ ਵਿੱਚ ਹਾਲ ਹੀ ਦੌਰਾਨ ਲੱਗੀਆਂ ਭਿਆਨਕ ਜੰਗਲੀ ਅੱਗਾਂ ਨਾਲ ਪ੍ਰਭਾਵਿਤ ਪਰਿਵਾਰਾਂ ਦੀ ਸਹਾਇਤਾ ਲਈ ਸਿੱਖ ਟੈਂਪਲ ਆਫ਼ ਸਪੋਕੇਨ ਦੀ ਸੰਗਤ ਵੱਲੋਂ 30,000 ਡਾਲਰ ਦੀ ਮਾਲੀ ਮਦਦ ਦਿੱਤੀ ਗਈ ਹੈ। ਇਹ ਰਕਮ Innovia Foundation ਰਾਹੀਂ ਅੱਗ ਪ੍ਰਭਾਵਿਤ ਪਰਿਵਾਰਾਂ ਦੀ ਰਾਹਤ ਅਤੇ ਮੁੜ ਵਸੇਬੇ ਲਈ ਵਰਤੀ ਜਾਵੇਗੀ।
ਐਤਵਾਰ ਨੂੰ ਨੌਰਥ ਬਾਰਕਰ ਰੋਡ ਸਥਿਤ ਸਿੱਖ ਟੈਂਪਲ ਵਿਖੇ ਹੋਏ ਸਮਾਗਮ ਦੌਰਾਨ ਸੰਗਤ ਵੱਲੋਂ 30,000 ਡਾਲਰ ਦਾ ਚੈੱਕ Innovia Foundation ਨੂੰ ਸੌਂਪਿਆ ਗਿਆ। ਫਾਊਂਡੇਸ਼ਨ ਦੀ ਮੁੱਖ ਕਾਰਜਕਾਰੀ ਅਧਿਕਾਰੀ Shelly O’Quinn ਨੇ ਚੈੱਕ ਪ੍ਰਾਪਤ ਕੀਤਾ। ਇਸ ਮੌਕੇ ਅਮਰੀਕੀ ਕਾਂਗਰਸਮੈਨ Michael Baumgartner ਵੀ ਮੌਜੂਦ ਸਨ।
O’Quinn ਨੇ ਕਿਹਾ ਕਿ ਇਹ ਦਾਨ ਦਰਸਾਉਂਦਾ ਹੈ ਕਿ ਭਾਈਚਾਰਾ ਸੰਕਟ ਦੇ ਸਮੇਂ ਇੱਕ-ਦੂਜੇ ਦੀ ਮਦਦ ਲਈ ਅੱਗੇ ਆ ਰਿਹਾ ਹੈ। ਉਨ੍ਹਾਂ ਮੁਤਾਬਕ ਅੱਗ ਨਾਲ ਸਿੱਧੇ ਤੌਰ ’ਤੇ ਪ੍ਰਭਾਵਿਤ ਨਾ ਹੋਏ ਲੋਕ ਵੀ ਆਪਣੇ ਗੁਆਂਢੀਆਂ ਅਤੇ ਲੋੜਵੰਦ ਪਰਿਵਾਰਾਂ ਦੀ ਮਦਦ ਕਰਨ ਦੀ ਮਹੱਤਤਾ ਨੂੰ ਸਮਝ ਰਹੇ ਹਨ।
ਵਾਸ਼ਿੰਗਟਨ ਸਟੇਟ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਅਤੇ ਸਿੱਖ ਭਾਈਚਾਰੇ ਦੇ ਮੈਂਬਰ ਕੁਲਵਿੰਦਰ ਸਿੰਘ ਗਿੱਲ ਨੇ ਕਿਹਾ ਕਿ ਸਿੱਖ ਭਾਈਚਾਰੇ ਵੱਲੋਂ ਸੰਕਟ ਦੇ ਸਮੇਂ ਮਦਦ ਕਰਨ ਦੀ ਭਾਵਨਾ ਕਿਸੇ ਇੱਕ ਇਲਾਕੇ ਤੱਕ ਸੀਮਤ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਸਪੋਕੇਨ ਵਿੱਚ ਅੱਗ ਹੋਵੇ ਜਾਂ ਨੇਪਾਲ ਵਿੱਚ ਹੜ੍ਹ, ਸਿੱਖ ਭਾਈਚਾਰਾ ਲੋੜਵੰਦਾਂ ਦੀ ਮਦਦ ਲਈ ਅੱਗੇ ਆਉਣ ਨੂੰ ਆਪਣੀ ਜ਼ਿੰਮੇਵਾਰੀ ਸਮਝਦਾ ਹੈ।
ਕਾਂਗਰਸਮੈਨ Baumgartner ਨੇ ਸਿੱਖ ਟੈਂਪਲ ਦੀ ਸੰਗਤ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਪਿਛਲੇ ਮਹੀਨੇ ਦੀਆਂ ਅੱਗਾਂ ਕਾਰਨ ਪੂਰਬੀ ਵਾਸ਼ਿੰਗਟਨ ਵਿੱਚ ਵੱਡੇ ਪੱਧਰ ’ਤੇ ਨੁਕਸਾਨ ਹੋਇਆ ਹੈ। ਉਨ੍ਹਾਂ ਮੁਤਾਬਕ ਬਹੁਤ ਸਾਰੇ ਘਰ ਤਬਾਹ ਹੋਏ ਅਤੇ ਕਈ ਪਰਿਵਾਰ ਪ੍ਰਭਾਵਿਤ ਹੋਏ ਹਨ।
Spokane Washington Sikh Temple Of Spokane Sikh Community Wildfire Wildfire Relief Innovia Foundation Sikh News Punjabi News USA Punjabi Pehchan
