ਵਾਸ਼ਿੰਗਟਨ ਦੇ ਪੇਪਰ ਮਿੱਲ ਹਾਦਸੇ:- 11 ਮਜ਼ਦੂਰਾਂ ਦੀ ਹੋਈ ਸੀ ਮੌਤ, ਕੰਪਨੀ ਨੂੰ 10.1 ਮਿਲੀਅਨ ਡਾਲਰ ਦਾ ਰਿਕਾਰਡ ਜੁਰਮਾਨਾ
November 21, 2026 / main news
Punjabi Pehchan /
Longview,wa
ਸੁਰੱਖਿਆ ਚਿਤਾਵਨੀਆਂ ਦੇ ਬਾਵਜੂਦ 43 ਹਫ਼ਤਿਆਂ ਤੱਕ ਵਰਤਿਆ ਗਿਆ ਖ਼ਤਰਨਾਕ ਕੈਮੀਕਲ ਟੈਂਕ
ਲੌਂਗਵਿਊ, ਵਾਸ਼ਿੰਗਟਨ (ਪੰਜਾਬੀ ਪਹਿਚਾਣ ਬਿਊਰੋ) — ਵਾਸ਼ਿੰਗਟਨ ਸੂਬੇ ਦੇ ਲੌਂਗਵਿਊ ਸ਼ਹਿਰ ਵਿੱਚ ਪੇਪਰ ਮਿੱਲ ਚਲਾਉਣ ਵਾਲੀ ਕੰਪਨੀ ਨਿਪੋਨ ਡਾਇਨਾਵੇਵ ਪੈਕੇਜਿੰਗ ਨੂੰ ਇੱਕ ਭਿਆਨਕ ਉਦਯੋਗਿਕ ਹਾਦਸੇ ਦੇ ਮਾਮਲੇ ਵਿੱਚ 10.1 ਮਿਲੀਅਨ ਡਾਲਰ ਤੋਂ ਵੱਧ ਦਾ ਜੁਰਮਾਨਾ ਲਗਾਇਆ ਗਿਆ ਹੈ।
26 ਮਈ ਨੂੰ ਮਿੱਲ ਵਿੱਚ ਇੱਕ ਕੈਮੀਕਲ ਟੈਂਕ ਫਟਣ ਕਾਰਨ 11 ਮਜ਼ਦੂਰਾਂ ਦੀ ਮੌਤ ਹੋ ਗਈ ਸੀ, ਜਦਕਿ 12 ਹੋਰ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋਏ ਸਨ।
ਵਾਸ਼ਿੰਗਟਨ ਦੇ ਲੇਬਰ ਐਂਡ ਇੰਡਸਟਰੀਜ਼ ਵਿਭਾਗ ਨੇ ਕੰਪਨੀ ਨੂੰ ਕੰਮਕਾਜੀ ਸੁਰੱਖਿਆ ਨਿਯਮਾਂ ਦੀਆਂ 75 ਉਲੰਘਣਾਵਾਂ ਲਈ ਦੋਸ਼ੀ ਠਹਿਰਾਉਂਦਿਆਂ ਲਗਭਗ 9.2 ਮਿਲੀਅਨ ਡਾਲਰ ਦਾ ਜੁਰਮਾਨਾ ਲਗਾਇਆ ਹੈ। ਇਹ ਵਿਭਾਗ ਦੇ ਇਤਿਹਾਸ ਵਿੱਚ ਸੁਰੱਖਿਆ ਉਲੰਘਣਾਵਾਂ ਲਈ ਲਗਾਇਆ ਗਿਆ ਸਭ ਤੋਂ ਵੱਡਾ ਜੁਰਮਾਨਾ ਹੈ।
ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਕੰਪਨੀ ਨੂੰ ਅਗਸਤ 2025 ਤੋਂ ਫਰਵਰੀ 2026 ਦਰਮਿਆਨ ਤਿੰਨ ਰਿਪੋਰਟਾਂ ਰਾਹੀਂ ਚਿਤਾਵਨੀ ਦਿੱਤੀ ਗਈ ਸੀ ਕਿ ਟੈਂਕ ਦੀਆਂ ਕੰਧਾਂ ਖ਼ੁਰ ਜਾਣ ਕਾਰਨ ਖ਼ਤਰਨਾਕ ਹੱਦ ਤੱਕ ਪਤਲੀਆਂ ਹੋ ਚੁੱਕੀਆਂ ਸਨ। ਇਸ ਦੇ ਬਾਵਜੂਦ ਕੰਪਨੀ ਨੇ 43 ਹਫ਼ਤਿਆਂ ਤੱਕ ਟੈਂਕ ਦੀ ਵਰਤੋਂ ਜਾਰੀ ਰੱਖੀ।
ਟੈਂਕ ਫਟਣ ਕਾਰਨ ਲਗਭਗ 9 ਲੱਖ ਗੈਲਨ ਖ਼ਤਰਨਾਕ ਰਸਾਇਣਕ ਤਰਲ ਬਾਹਰ ਨਿਕਲ ਗਿਆ। ਇਹ ਰਸਾਇਣ ਕੋਲੰਬੀਆ ਦਰਿਆ ਤੱਕ ਪਹੁੰਚ ਗਿਆ, ਜਿਸ ਕਾਰਨ ਵੱਡੀ ਗਿਣਤੀ ਵਿੱਚ ਮੱਛੀਆਂ ਦੀ ਵੀ ਮੌਤ ਹੋ ਗਈ। ਵਾਤਾਵਰਣ ਵਿਭਾਗ ਨੇ ਜੁਰਮਾਨੇ ਅਤੇ ਐਮਰਜੈਂਸੀ ਕਾਰਵਾਈ ਦੇ ਖ਼ਰਚਿਆਂ ਵਜੋਂ ਲਗਭਗ 10 ਲੱਖ ਡਾਲਰ ਹੋਰ ਲਗਾਏ ਹਨ।
ਛੇ ਮਹੀਨੇ ਚੱਲੀ ਜਾਂਚ ਦੌਰਾਨ 70 ਤੋਂ ਵੱਧ ਗਵਾਹਾਂ ਦੇ ਬਿਆਨ ਲਏ ਗਏ ਅਤੇ 40 ਹਜ਼ਾਰ ਤੋਂ ਵੱਧ ਦਸਤਾਵੇਜ਼ਾਂ ਦੀ ਪੜਤਾਲ ਕੀਤੀ ਗਈ।
ਅਧਿਕਾਰੀਆਂ ਨੇ ਇਸ ਘਟਨਾ ਨੂੰ ਵਾਸ਼ਿੰਗਟਨ ਸੂਬੇ ਦੇ ਆਧੁਨਿਕ ਇਤਿਹਾਸ ਦਾ ਸਭ ਤੋਂ ਭਿਆਨਕ ਉਦਯੋਗਿਕ ਹਾਦਸਾ ਕਰਾਰ ਦਿੱਤਾ ਹੈ। ਜਾਣਬੁੱਝ ਕੇ ਸੁਰੱਖਿਆ ਨਿਯਮਾਂ ਦੀ ਉਲੰਘਣਾ ਕਰਨ ਦੇ ਮਾਮਲੇ ਨੂੰ ਸੰਭਾਵਿਤ ਅਪਰਾਧਿਕ ਕਾਰਵਾਈ ਲਈ ਵੀ ਭੇਜਿਆ ਜਾਵੇਗਾ।
Longview paper mill fatal chemical spill record fine