ਟੈਨੇਸੀ ਵਿੱਚ 200 ਸਾਲਾਂ ਤੋਂ ਵੱਧ ਸਮੇਂ ਬਾਅਦ ਮਹਿਲਾ ਨੂੰ ਮੌਤ ਦੀ ਸਜ਼ਾ ਦੇਣ ਦੀ ਤਿਆਰੀ
Punjabi Pehchan / Tennessee
1995 ਵਿੱਚ ਸਹਿਪਾਠਣ ਦੇ ਕਤਲ ਦੀ ਦੋਸ਼ੀ ਕ੍ਰਿਸਟਾ ਪਾਈਕ ਨੂੰ 30 ਸਤੰਬਰ ਨੂੰ ਲਾਇਆ ਜਾਵੇਗਾ ਘਾਤਕ ਟੀਕਾ
ਨੈਸ਼ਵਿਲ, ਟੈਨੇਸੀ (ਪੰਜਾਬੀ ਪਹਿਚਾਣ ): ਅਮਰੀਕਾ ਦੇ ਟੈਨੇਸੀ ਸੂਬੇ ਵਿੱਚ 1995 ਦੇ ਕਤਲ ਮਾਮਲੇ ਦੀ ਦੋਸ਼ੀ ਕ੍ਰਿਸਟਾ ਪਾਈਕ ਨੂੰ ਬੁੱਧਵਾਰ, 30 ਸਤੰਬਰ ਨੂੰ ਘਾਤਕ ਟੀਕੇ ਰਾਹੀਂ ਮੌਤ ਦੀ ਸਜ਼ਾ ਦੇਣ ਦੀ ਤਿਆਰੀ ਹੈ। ਸਜ਼ਾ ਨੈਸ਼ਵਿਲ ਦੀ ਰਿਵਰਬੈਂਡ ਉੱਚ ਸੁਰੱਖਿਆ ਜੇਲ੍ਹ ਵਿੱਚ ਦਿੱਤੀ ਜਾਣੀ ਹੈ। ਸੀਮਤ ਇਤਿਹਾਸਕ ਰਿਕਾਰਡਾਂ ਅਨੁਸਾਰ, ਇਹ ਸੂਬੇ ਵਿੱਚ 200 ਸਾਲਾਂ ਤੋਂ ਵੱਧ ਸਮੇਂ ਬਾਅਦ ਕਿਸੇ ਮਹਿਲਾ ਨੂੰ ਮੌਤ ਦੀ ਸਜ਼ਾ ਦਿੱਤੇ ਜਾਣ ਦਾ ਪਹਿਲਾ ਮਾਮਲਾ ਹੋਵੇਗਾ।
ਹੁਣ 50 ਸਾਲਾਂ ਦੀ ਪਾਈਕ ਅਪਰਾਧ ਸਮੇਂ 18 ਸਾਲ ਦੀ ਸੀ। ਉਸ ਨੂੰ ਨਾਕਸਵਿਲ ਦੇ ਰੁਜ਼ਗਾਰ ਸਿਖਲਾਈ ਪ੍ਰੋਗਰਾਮ ਵਿੱਚ ਆਪਣੀ 19 ਸਾਲਾਂ ਦੀ ਸਹਿਪਾਠਣ ਕੋਲੀਨ ਸਲੇਮਰ ਦੇ ਕਤਲ ਲਈ ਦੋਸ਼ੀ ਠਹਿਰਾਇਆ ਗਿਆ ਸੀ।
ਸਰਕਾਰੀ ਵਕੀਲਾਂ ਅਨੁਸਾਰ, ਪਾਈਕ ਨੂੰ ਸ਼ੱਕ ਸੀ ਕਿ ਸਲੇਮਰ ਉਸ ਦੇ ਪ੍ਰੇਮੀ ਨਾਲ ਰਿਸ਼ਤਾ ਬਣਾਉਣਾ ਚਾਹੁੰਦੀ ਸੀ। ਇਸ ਕਾਰਨ ਪਾਈਕ ਅਤੇ ਉਸ ਦੇ ਪ੍ਰੇਮੀ ਨੇ 12 ਜਨਵਰੀ, 1995 ਨੂੰ ਸਲੇਮਰ ਨੂੰ ਜੰਗਲੀ ਇਲਾਕੇ ਵਿੱਚ ਲਿਜਾ ਕੇ ਤਸ਼ੱਦਦ ਕਰਨ ਮਗਰੋਂ ਮਾਰ ਦਿੱਤਾ। ਅਦਾਲਤੀ ਦਸਤਾਵੇਜ਼ਾਂ ਅਨੁਸਾਰ, ਪਾਈਕ ਨੇ ਪੀੜਤਾ ਦੀ ਖੋਪੜੀ ਦਾ ਇੱਕ ਟੁਕੜਾ ਵੀ ਆਪਣੇ ਕੋਲ ਰੱਖਿਆ ਸੀ। ਸਾਲ 1996 ਵਿੱਚ ਉਸ ਨੂੰ ਮੌਤ ਦੀ ਸਜ਼ਾ ਸੁਣਾਈ ਗਈ।
ਪਾਈਕ ਨੇ ਆਪਣਾ ਦੋਸ਼ ਨਕਾਰਿਆ ਨਹੀਂ ਹੈ। ਹਾਲਾਂਕਿ, ਉਸ ਦੇ ਵਕੀਲਾਂ ਅਤੇ ਹਮਾਇਤੀਆਂ ਨੇ ਸਜ਼ਾ ਘਟਾਉਣ ਦੀ ਮੰਗ ਕਰਦਿਆਂ ਕਿਹਾ ਕਿ ਅਪਰਾਧ ਸਮੇਂ ਉਹ ਅੱਲ੍ਹੜ ਉਮਰ ਵਿੱਚ ਸੀ ਅਤੇ ਮਾਨਸਿਕ ਬਿਮਾਰੀ ਨਾਲ ਜੂਝ ਰਹੀ ਸੀ। ਉਨ੍ਹਾਂ ਨੇ ਉਸ ਦੇ ਬਚਪਨ ਦੌਰਾਨ ਜਿਨਸੀ ਸ਼ੋਸ਼ਣ ਅਤੇ ਅਣਗਹਿਲੀ ਦਾ ਵੀ ਹਵਾਲਾ ਦਿੱਤਾ।
ਬਚਾਅ ਪੱਖ ਨੇ ਪਾਈਕ ਦੇ ਖ਼ੂਨ ਵਿੱਚ ਪਲੇਟਲੈਟਾਂ ਦੀ ਵੱਧ ਗਿਣਤੀ ਵਾਲੀ ਬਿਮਾਰੀ ਦਾ ਹਵਾਲਾ ਦੇ ਕੇ ਦਲੀਲ ਦਿੱਤੀ ਕਿ ਘਾਤਕ ਟੀਕਾ ਉਸ ਲਈ ਵਾਧੂ ਪੀੜਾ ਦਾ ਕਾਰਨ ਬਣ ਸਕਦਾ ਹੈ। ਪਾਈਕ ਨੇ ਆਪਣੀ ਜਿਨਸੀ ਸ਼ੋਸ਼ਣ ਦੀ ਪਿਛੋਕੜ ਕਾਰਨ ਸਜ਼ਾ ਦੇਣ ਵਾਲੀ ਟੀਮ ਵਿੱਚ ਸਿਰਫ਼ ਮਹਿਲਾਵਾਂ ਨੂੰ ਸ਼ਾਮਲ ਕਰਨ ਦੀ ਮੰਗ ਵੀ ਕੀਤੀ ਸੀ।
ਟੈਨੇਸੀ ਦੇ ਗਵਰਨਰ ਬਿਲ ਲੀ ਨੇ 28 ਸਤੰਬਰ ਨੂੰ ਉਸ ਦੀ ਰਹਿਮ ਦੀ ਅਪੀਲ ਰੱਦ ਕਰ ਦਿੱਤੀ।
ਸੂਬੇ ਵਿੱਚ ਮੁੱਢਲੇ ਸਮੇਂ ਦੀਆਂ ਸਜ਼ਾਵਾਂ ਦੇ ਪੂਰੇ ਸਰਕਾਰੀ ਰਿਕਾਰਡ ਉਪਲਬਧ ਨਹੀਂ ਹਨ। ਕੁਝ ਇਤਿਹਾਸਕ ਸਰੋਤ ਆਖ਼ਰੀ ਮਹਿਲਾ ਨੂੰ 1819 ਵਿੱਚ ਮੌਤ ਦੀ ਸਜ਼ਾ ਦਿੱਤੇ ਜਾਣ ਦਾ ਜ਼ਿਕਰ ਕਰਦੇ ਹਨ। ਇਸੇ ਕਾਰਨ ਇਸ ਮਾਮਲੇ ਨੂੰ ਲਗਭਗ 207 ਸਾਲਾਂ ਬਾਅਦ ਮਹਿਲਾ ਨੂੰ ਮੌਤ ਦੀ ਸਜ਼ਾ ਦਿੱਤੇ ਜਾਣ ਵਜੋਂ ਦਰਸਾਇਆ ਜਾ ਰਿਹਾ ਹੈ।
Christa Pike Tennessee Execution Christa Pike Execution 2026 Colleen Slemmer Murder Tennessee Death Penalty First Woman Executed In Tennessee In 200 Years Punjabi USA News Punjabi Pehchan
