ਟ੍ਰੇਸੀ ਦੇ ਅਵਤਾਰ ਸਿੰਘ ਦੇ ਅਗਵਾ ਤੇ ਕਤਲ ਮਾਮਲੇ ਵਿੱਚ ਤਿੰਨ ਮੁਲਜ਼ਮਾਂ ਦੀ ਪਛਾਣ; ਦੋਸ਼ ਤੈਅ, ਭਾਲ ਜਾਰੀ
Punjabi Pehchan / Tracy,ca
ਅਵਤਾਰ ਸਿੰਘ ਗ਼ਲਤ ਪਛਾਣ ਦਾ ਸ਼ਿਕਾਰ ਹੋਏ।
ਮੁਲਜ਼ਮਾਂ ਦੀ ਪਛਾਣ ਅਲਬਰਟੋ ਅਲੈਂਕਾਸਟਰੋ, 25; ਅਲਫੋਂਸੋ ਸੇਗੂਰਾ, 20; ਅਤੇ ਬਾਰਨਾਬੇ ਸੇਗੂਰਾ, 22
ਸੈਨ ਵਾਕੀਨ ਕਾਊਂਟੀ, ਕੈਲੀਫ਼ੋਰਨੀਆ (ਪੰਜਾਬੀ ਪਹਿਚਾਣ): ਟ੍ਰੇਸੀ ਦੇ ਗੁਰਦੁਆਰੇ ਤੋਂ ਅਗਵਾ ਕੀਤੇ ਗਏ ਅਵਤਾਰ ਸਿੰਘ ਦੇ ਕਤਲ ਮਾਮਲੇ ਵਿੱਚ ਤਿੰਨ ਵਿਅਕਤੀਆਂ ਦੀ ਪਛਾਣ ਕਰਕੇ ਉਨ੍ਹਾਂ ਵਿਰੁੱਧ ਦੋਸ਼ ਤੈਅ ਕੀਤੇ ਗਏ ਹਨ। ਸੈਨ ਵਾਕੀਨ ਕਾਊਂਟੀ ਸ਼ੈਰਿਫ਼ ਦਫ਼ਤਰ ਨੇ ਬੁੱਧਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਤਿੰਨੇ ਮੁਲਜ਼ਮ ਅਜੇ ਫ਼ਰਾਰ ਹਨ।
ਅਧਿਕਾਰੀਆਂ ਅਨੁਸਾਰ, ਅਵਤਾਰ ਸਿੰਘ ਨੂੰ 17 ਫ਼ਰਵਰੀ ਦੁਪਹਿਰ ਕਰੀਬ ਢਾਈ ਵਜੇ ਟ੍ਰੇਸੀ ਦੇ ਗੁਰਦੁਆਰੇ ਤੋਂ ਅਗਵਾ ਕੀਤਾ ਗਿਆ ਸੀ। ਉਨ੍ਹਾਂ ਦੇ ਲਾਪਤਾ ਹੋਣ ਬਾਰੇ ਰਾਤ ਕਰੀਬ ਨੌਂ ਵਜੇ ਪਤਾ ਲੱਗਿਆ। ਨਿਗਰਾਨੀ ਕੈਮਰਿਆਂ ਦੀਆਂ ਤਸਵੀਰਾਂ ਵਿੱਚ ਤਿੰਨ ਵਿਅਕਤੀ ਉਨ੍ਹਾਂ ਨੂੰ ਚਿੱਟੇ ਰੰਗ ਦੀ ਐੱਸਯੂਵੀ ਵਿੱਚ ਲਿਜਾਂਦੇ ਦਿਖਾਈ ਦਿੱਤੇ।
ਸ਼ੈਰਿਫ਼ ਦਫ਼ਤਰ ਮੁਤਾਬਕ, ‘ਫਲੌਕ’ ਨੰਬਰ ਪਲੇਟ ਪੜ੍ਹਨ ਵਾਲੀ ਤਕਨੀਕ ਦੀ ਮਦਦ ਨਾਲ ਸ਼ੱਕੀ ਗੱਡੀ ਦੀ ਪਛਾਣ ਹੋਈ। ਗੱਡੀ ਦਾ ਪਤਾ ਵਲੇਹੋ ਸ਼ਹਿਰ ਵਿੱਚ ਲੱਗਿਆ ਅਤੇ ਉਸ ਨੂੰ 19 ਫ਼ਰਵਰੀ ਨੂੰ ਕਬਜ਼ੇ ਵਿੱਚ ਲੈ ਲਿਆ ਗਿਆ। ਅਗਵਾ ਹੋਣ ਤੋਂ ਤਿੰਨ ਦਿਨ ਬਾਅਦ, 20 ਫ਼ਰਵਰੀ ਨੂੰ ਅਵਤਾਰ ਸਿੰਘ ਦੀ ਲਾਸ਼ 100 ਮੀਲ ਤੋਂ ਵੱਧ ਦੂਰ ਬੇਰੀਏਸਾ ਝੀਲ ਨੇੜਿਓਂ ਮਿਲੀ।
ਅਵਤਾਰ ਸਿੰਘ ਆਪਣੀ ਪਤਨੀ ਅਤੇ ਬੱਚਿਆਂ ਨਾਲ ਗੁਰਦੁਆਰੇ ਦੇ ਵਿੱਚ ਰਹਿੰਦੇ ਸਨ। ਉਨ੍ਹਾਂ ਦੇ ਪਰਿਵਾਰ ਵਿੱਚ ਤਿੰਨ ਇਕੱਠੇ ਜੰਮੇ ਬੱਚੇ ਵੀ ਹਨ, ਜਿਨ੍ਹਾਂ ਦਾ ਜਨਮ ਅਗਵਾ ਦੀ ਘਟਨਾ ਤੋਂ ਕੁਝ ਸਮਾਂ ਪਹਿਲਾਂ ਹੋਇਆ ਸੀ।
ਜਾਂਚ ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਅਵਤਾਰ ਸਿੰਘ ਗ਼ਲਤ ਪਛਾਣ ਦਾ ਸ਼ਿਕਾਰ ਹੋਏ। ਅਸਲ ਨਿਸ਼ਾਨਾ ਉਹ ਵਿਅਕਤੀ ਸੀ ਜੋ ਘਟਨਾ ਸਮੇਂ ਕੈਨੇਡਾ ਵਿੱਚ ਸੀ। ਜਾਂਚ ਟੀਮ ਨੇ 25 ਤੋਂ 27 ਫ਼ਰਵਰੀ ਤੱਕ ਕੈਨੇਡਾ ਜਾ ਕੇ ਪੜਤਾਲ ਕੀਤੀ। ਪੁਲਿਸ ਅਨੁਸਾਰ, ਉਸ ਵਿਅਕਤੀ ਅਤੇ ਉਸ ਦੇ ਪਰਿਵਾਰ ਨੂੰ ਮਾਲ ਨਾਲ ਭਰੇ ਇੱਕ ਚੋਰੀ ਹੋਏ ਟ੍ਰੇਲਰ ਦੇ ਮਾਮਲੇ ਨਾਲ ਸਬੰਧਤ ਧਮਕੀਆਂ ਮਿਲ ਰਹੀਆਂ ਸਨ।
ਮੁਲਜ਼ਮਾਂ ਦੀ ਪਛਾਣ ਅਲਬਰਟੋ ਅਲੈਂਕਾਸਟਰੋ, 25; ਅਲਫੋਂਸੋ ਸੇਗੂਰਾ, 20; ਅਤੇ ਬਾਰਨਾਬੇ ਸੇਗੂਰਾ, 22 ਵਜੋਂ ਹੋਈ ਹੈ। ਤਿੰਨੇ ਵਲੇਹੋ ਦੇ ਵਸਨੀਕ ਹਨ ਅਤੇ ਅਧਿਕਾਰੀਆਂ ਮੁਤਾਬਕ ਉਨ੍ਹਾਂ ਦੇ ਮੈਕਸੀਕੋ ਨਾਲ ਸਬੰਧ ਹਨ। ਉਨ੍ਹਾਂ ਵਿਰੁੱਧ ਵਿਸ਼ੇਸ਼ ਹਾਲਾਤਾਂ ਤਹਿਤ ਕਤਲ ਅਤੇ ਅਗਵਾ ਸਮੇਤ ਦੋਸ਼ ਤੈਅ ਕੀਤੇ ਗਏ ਹਨ।
ਪੁਲਿਸ ਨੇ ਤਿੰਨਾਂ ਨੂੰ ਹਥਿਆਰਬੰਦ ਅਤੇ ਖ਼ਤਰਨਾਕ ਦੱਸਦਿਆਂ ਲੋਕਾਂ ਨੂੰ ਉਨ੍ਹਾਂ ਕੋਲ ਨਾ ਜਾਣ ਅਤੇ ਕੋਈ ਵੀ ਜਾਣਕਾਰੀ ਤੁਰੰਤ ਅਧਿਕਾਰੀਆਂ ਨੂੰ ਦੇਣ ਦੀ ਅਪੀਲ ਕੀਤੀ ਹੈ।
Avtar singh murder avtar singh kidnapping tracy gurdwara tracy sikh man murder san joaquin county sheriff lake berryessa vallejo suspects california punjabi news punjabi pehchan newspaper
