ਬਰੈਂਪਟਨ ਦੇ ਸਟੈਲੈਂਟਿਸ ਪਲਾਂਟ ਦੀ ਵਿਕਰੀ ਰੁਕਣ ਦੀਆਂ ਉਮੀਦਾਂ ਘੱਟ
November 21, 2026 / canada
Punjabi Pehchan /
ਬਰੈਂਪਟਨ: Canada
2,200 ਕਾਮਿਆਂ ਦੀਆਂ ਨੌਕਰੀਆਂ ਖ਼ਤਰੇ 'ਚ
ਪਲਾਂਟ ਦੀ ਵਿਕਰੀ ਸਬੰਧੀ ਉਸ ਦੇ ਫ਼ੈਸਲੇ ਵਿੱਚ ਕੋਈ ਤਬਦੀਲੀ ਨਹੀਂ ਆਈ
ਬਰੈਂਪਟਨ ਦੇ ਸਟੈਲੈਂਟਿਸ ਕਾਰ ਨਿਰਮਾਣ ਪਲਾਂਟ ਦੀ ਵਿਕਰੀ ਰੋਕਣ ਦੀਆਂ ਉਮੀਦਾਂ ਘੱਟ ਹੁੰਦੀਆਂ ਨਜ਼ਰ ਆ ਰਹੀਆਂ ਹਨ। ਫੈਡਰਲ ਸਰਕਾਰ ਵੱਲੋਂ ਆਖ਼ਰੀ ਸਮੇਂ 'ਤੇ ਕੰਪਨੀ ਦੇ ਅਧਿਕਾਰੀਆਂ ਨਾਲ ਮੀਟਿੰਗ ਬੁਲਾਈ ਗਈ ਹੈ, ਪਰ ਸੂਤਰਾਂ ਮੁਤਾਬਕ ਕੰਪਨੀ ਰੋਸ਼ੈਲ ਰੱਖਿਆ ਕੰਪਨੀ ਨੂੰ ਪਲਾਂਟ ਵੇਚਣ ਦੇ ਫ਼ੈਸਲੇ 'ਤੇ ਕਾਇਮ ਹੈ।
ਸ਼ੁੱਕਰਵਾਰ ਨੂੰ ਹੋਣ ਵਾਲੀ ਮੀਟਿੰਗ ਵਿੱਚ ਉਦਯੋਗ ਮੰਤਰੀ ਮੇਲਾਨੀ ਜੋਲੀ, ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ, ਯੂਨੀਫੋਰ ਦੀ ਪ੍ਰਧਾਨ ਲਾਨਾ ਪੇਨ ਅਤੇ ਸਟੈਲੈਂਟਿਸ ਦੇ ਗਲੋਬਲ ਮੁਖੀ ਐਂਟੋਨੀਓ ਫਿਲੋਸਾ ਸ਼ਾਮਲ ਹੋਣਗੇ। ਰਿਪੋਰਟ ਮੁਤਾਬਕ ਸਰਕਾਰ ਕੰਪਨੀ ਨੂੰ ਪਲਾਂਟ ਚਾਲੂ ਰੱਖਣ ਲਈ ਵਾਧੂ ਵਿੱਤੀ ਸਹਾਇਤਾ ਦੀ ਪੇਸ਼ਕਸ਼ ਕਰ ਸਕਦੀ ਹੈ। ਇਸ ਤੋਂ ਪਹਿਲਾਂ ਉਦਯੋਗ ਮੰਤਰੀ ਨੇ 2022 ਦੇ ਸਰਕਾਰੀ ਸਮਝੌਤੇ ਦੀ ਉਲੰਘਣਾ ਕਰਨ ਦੇ ਦੋਸ਼ ਹੇਠ ਕੰਪਨੀ ਖ਼ਿਲਾਫ਼ ਕਰੋੜਾਂ ਡਾਲਰ ਦਾ ਮੁਕੱਦਮਾ ਕਰਨ ਦੀ ਚਿਤਾਵਨੀ ਦਿੱਤੀ ਸੀ।
ਪਲਾਂਟ ਦੀ ਵਿਕਰੀ ਨਾਲ ਲਗਭਗ 2,200 ਆਟੋ ਕਾਮਿਆਂ ਦੀਆਂ ਨੌਕਰੀਆਂ ਪ੍ਰਭਾਵਿਤ ਹੋਣ ਦਾ ਖ਼ਦਸ਼ਾ ਹੈ। ਰੋਸ਼ੈਲ ਨੇ ਛਾਂਟੀ ਦਾ ਸਾਮ੍ਹਣਾ ਕਰ ਰਹੇ ਸਟੈਲੈਂਟਿਸ ਕਾਮਿਆਂ ਨੂੰ ਤਰਜੀਹ ਦੇਣ ਦੀ ਗੱਲ ਕਹੀ ਹੈ, ਪਰ ਭਰਤੀ ਦੀ ਗਿਣਤੀ ਸਪੱਸ਼ਟ ਨਹੀਂ ਕੀਤੀ। ਦੂਜੇ ਪਾਸੇ, ਆਟੋਮੋਟਿਵ ਪਾਰਟਸ ਮੈਨੂਫੈਕਚਰਰਜ਼ ਐਸੋਸੀਏਸ਼ਨ ਦੇ ਮੁਖੀ ਫਲੇਵੀਓ ਵੋਲਪੇ ਦਾ ਕਹਿਣਾ ਹੈ ਕਿ ਸਰਕਾਰ ਅਜੇ ਵੀ ਅਜਿਹੀ ਪੇਸ਼ਕਸ਼ ਕਰ ਸਕਦੀ ਹੈ, ਜਿਸ ਨਾਲ ਕੰਪਨੀ ਆਪਣਾ ਫ਼ੈਸਲਾ ਬਦਲ ਲਵੇ। ਹਾਲਾਂਕਿ, ਸਟੈਲੈਂਟਿਸ ਨੇ ਕਿਹਾ ਹੈ ਕਿ ਪਲਾਂਟ ਦੀ ਵਿਕਰੀ ਸਬੰਧੀ ਉਸ ਦੇ ਫ਼ੈਸਲੇ ਵਿੱਚ ਕੋਈ ਤਬਦੀਲੀ ਨਹੀਂ ਆਈ।
Low Likelihood Of The Sale Of The Stellantis Plant In Brampton Being Halted