ਭਿਆਨਕ ਜਹਾਜ਼ ਹਾਦਸਾ: ਦਿੱਲੀ ਜਾ ਰਹੀ ਏਅਰ ਐਂਬੂਲੈਂਸ ਕਰੈਸ਼, ਮਰੀਜ਼ ਤੇ ਡਾਕਟਰ ਸਮੇਤ 7 ਮੌਤਾਂ

ਰਾਂਚੀ/ਚਤਰਾ, 24 Feb 2026 : ਝਾਰਖੰਡ ਦੇ ਚਤਰਾ ਜ਼ਿਲ੍ਹੇ ਤੋਂ ਇੱਕ ਬੇਹੱਦ ਮੰਦਭਾਗੀ ਖ਼ਬਰ ਮਿਲੀ ਹੈ। ਰਾਂਚੀ ਤੋਂ ਦਿੱਲੀ ਲਈ ਰਵਾਨਾ ਹੋਈ ਇੱਕ ਨਿੱਜੀ ਏਅਰ ਐਂਬੂਲੈਂਸ ਸੋਮਵਾਰ ਸ਼ਾਮ ਸਿਮਰੀਆ ਦੇ ਸੰਘਣੇ ਜੰਗਲਾਂ ਵਿੱਚ ਹਾਦਸਾਗ੍ਰਸਤ ਹੋ ਗਈ। 'ਰੇਡਬਰਡ ਏਅਰਵੇਜ਼' ਦੇ ਇਸ ਚਾਰਟਰਡ ਜਹਾਜ਼ ਵਿੱਚ ਸਵਾਰ ਸਾਰੇ ਸੱਤ ਲੋਕਾਂ ਦੀ ਮੌਤ ਹੋਣ ਦੀ ਪੁਸ਼ਟੀ ਹੋਈ ਹੈ।

ਹਾਦਸੇ ਦਾ ਵੇਰਵਾ

ਇਸ ਜਹਾਜ਼ ਨੇ ਸ਼ਾਮ 7:11 ਵਜੇ ਰਾਂਚੀ ਹਵਾਈ ਅੱਡੇ ਤੋਂ ਉਡਾਣ ਭਰੀ ਸੀ, ਪਰ ਮਹਿਜ਼ 20 ਮਿੰਟਾਂ ਬਾਅਦ ਹੀ ਸ਼ਾਮ 7:34 ਵਜੇ ਇਸ ਦਾ ਸੰਪਰਕ ਟੁੱਟ ਗਿਆ। ਜੰਗਲ ਵਿੱਚ ਡਿੱਗਦੇ ਹੀ ਜਹਾਜ਼ ਨੂੰ ਭਿਆਨਕ ਅੱਗ ਲੱਗ ਗਈ। ਇਹ ਏਅਰ ਐਂਬੂਲੈਂਸ ਇੱਕ ਗੰਭੀਰ ਰੂਪ ਵਿੱਚ ਝੁਲਸੇ ਹੋਏ ਮਰੀਜ਼ ਨੂੰ ਇਲਾਜ ਲਈ ਦਿੱਲੀ ਲਿਜਾ ਰਹੀ ਸੀ।

ਮ੍ਰਿਤਕਾਂ ਦੀ ਪਛਾਣ

ਇਸ ਦਰਦਨਾਕ ਹਾਦਸੇ ਵਿੱਚ ਪਾਇਲਟ ਕੈਪਟਨ ਵਿਵੇਕ ਵਿਕਾਸ ਭਗਤ, ਕੋ-ਪਾਇਲਟ ਕੈਪਟਨ ਸਬਰਾਜਦੀਪ ਸਿੰਘ, ਮਰੀਜ਼ ਸੰਜੇ ਕੁਮਾਰ, ਉਸ ਦੇ ਦੋ ਰਿਸ਼ਤੇਦਾਰ, ਇੱਕ ਡਾਕਟਰ ਅਤੇ ਇੱਕ ਪੈਰਾ-ਮੈਡੀਕਲ ਸਟਾਫ਼ ਮੈਂਬਰ ਨੇ ਆਪਣੀ ਜਾਨ ਗੁਆ ਦਿੱਤੀ ਹੈ।

ਜ਼ਿੰਦਗੀ ਬਚਾਉਣ ਦੀ ਕੋਸ਼ਿਸ਼ ਬਣੀ ਕਾਲ

ਲਾਤੇਹਾਰ ਦੇ ਰਹਿਣ ਵਾਲੇ ਮਰੀਜ਼ ਸੰਜੇ ਕੁਮਾਰ ਨੂੰ 65 ਫੀਸਦੀ ਸੜੀ ਹੋਈ ਹਾਲਤ ਵਿੱਚ ਰਾਂਚੀ ਤੋਂ ਦਿੱਲੀ ਸ਼ਿਫਟ ਕੀਤਾ ਜਾ ਰਿਹਾ ਸੀ। ਪਰਿਵਾਰਕ ਮੈਂਬਰਾਂ ਨੇ ਬਿਹਤਰ ਇਲਾਜ ਦੀ ਆਸ ਵਿੱਚ ਏਅਰ ਐਂਬੂਲੈਂਸ ਦਾ ਪ੍ਰਬੰਧ ਕੀਤਾ ਸੀ, ਪਰ ਕਿਸੇ ਨੂੰ ਨਹੀਂ ਪਤਾ ਸੀ ਕਿ ਇਹ ਸਫ਼ਰ ਅਜਿਹੇ ਭਿਆਨਕ ਮੋੜ 'ਤੇ ਖ਼ਤਮ ਹੋਵੇਗਾ।

Powered by Froala Editor

Terrible Plane Crash Delhi bound Air Ambulance Crashes 7 Dead Including Patient And Doctor