ਕੈਨੇਡਾ ਵਿੱਚ ਕਾਰ ਚੋਰੀ ਕਰਨ ਵਾਲੇ ਗਿਰੋਹ ਦਾ ਪਰਦਾਫਾਸ਼
November 17, 2026 / crime
Punjabi Pehchan /
ਟੋਰਾਂਟੋ: Canada
96 ਚੋਰੀ ਦੀਆਂ ਗੱਡੀਆਂ ਬਰਾਮਦ, 12 ਮੁਲਜ਼ਮ ਗ੍ਰਿਫ਼ਤਾਰ
ਗਿਰੋਹ ਦੇ ਪੰਜ ਮੁੱਖ ਮੈਂਬਰ ਚੋਰੀ, ਗੱਡੀਆਂ ਦੀ ਢੋਆ-ਢੁਆਈ ਅਤੇ ਵਿਦੇਸ਼ ਭੇਜਣ ਦਾ ਕੰਮ ਸੰਭਾਲਦੇ ਸਨ
16 ਨਵੰਬਰ: ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਕਾਰਾਂ ਚੋਰੀ ਕਰਕੇ ਪੱਛਮੀ ਅਫ਼ਰੀਕਾ ਭੇਜਣ ਵਾਲੇ ਇੱਕ ਵੱਡੇ ਅਪਰਾਧਿਕ ਗਿਰੋਹ ਦਾ ਪੁਲਿਸ ਨੇ ਪਰਦਾਫਾਸ਼ ਕੀਤਾ ਹੈ। ਇਸ ਕਾਰਵਾਈ ਦੌਰਾਨ 96 ਚੋਰੀ ਦੀਆਂ ਗੱਡੀਆਂ ਬਰਾਮਦ ਕੀਤੀਆਂ ਗਈਆਂ ਹਨ, ਜਿਨ੍ਹਾਂ ਦੀ ਕੁੱਲ ਕੀਮਤ ਲਗਭਗ 45 ਲੱਖ ਡਾਲਰ ਦੱਸੀ ਗਈ ਹੈ।
ਪੁਲਿਸ ਨੇ ਇਸ ਮਾਮਲੇ ਵਿੱਚ 12 ਲੋਕਾਂ ਖ਼ਿਲਾਫ਼ ਦੋਸ਼ ਦਰਜ ਕੀਤੇ ਹਨ। 'ਪ੍ਰੋਜੈਕਟ ਕੈਡੇਟਾ' ਨਾਮ ਹੇਠ ਇਹ ਜਾਂਚ ਮਾਰਚ 2026 ਵਿੱਚ ਬਰੈਂਪਟਨ ਦੇ ਇੱਕ ਗੋਦਾਮ ਤੋਂ ਸ਼ੁਰੂ ਹੋਈ ਸੀ। ਜਾਂਚ ਦੌਰਾਨ ਪੁਲਿਸ ਨੂੰ ਪਤਾ ਲੱਗਾ ਕਿ ਗਿਰੋਹ ਪੀਲ ਖੇਤਰ ਅਤੇ ਗ੍ਰੇਟਰ ਟੋਰਾਂਟੋ ਵਿੱਚੋਂ ਚੋਰੀ ਕੀਤੀਆਂ ਲਗਜ਼ਰੀ ਗੱਡੀਆਂ ਅਤੇ ਪਿਕਅੱਪ ਟਰੱਕਾਂ ਨੂੰ ਸਮੁੰਦਰੀ ਕੰਟੇਨਰਾਂ ਰਾਹੀਂ ਵਿਦੇਸ਼ ਭੇਜਦਾ ਸੀ। ਕੈਨੇਡਾ ਸਰਹੱਦੀ ਸੇਵਾ ਏਜੰਸੀ ਦੀ ਮਦਦ ਨਾਲ ਪੁਲਿਸ ਨੇ ਇਹ ਗੱਡੀਆਂ ਬੰਦਰਗਾਹਾਂ ਤੋਂ ਬਰਾਮਦ ਕੀਤੀਆਂ।
ਪੁਲਿਸ ਮੁਤਾਬਕ ਇਸ ਗਿਰੋਹ ਦੇ ਪੰਜ ਮੁੱਖ ਮੈਂਬਰ ਚੋਰੀ, ਗੱਡੀਆਂ ਦੀ ਢੋਆ-ਢੁਆਈ ਅਤੇ ਵਿਦੇਸ਼ ਭੇਜਣ ਦਾ ਕੰਮ ਸੰਭਾਲਦੇ ਸਨ। ਦੋ ਹੋਰ ਸ਼ੱਕੀਆਂ ਦੀ ਭਾਲ ਜਾਰੀ ਹੈ। ਪੁਲਿਸ ਅਨੁਸਾਰ 2023 ਵਿੱਚ ਕਾਰ ਚੋਰੀਆਂ ਦੇ ਸਿਖਰ ਤੋਂ ਬਾਅਦ ਇਲਾਕੇ ਵਿੱਚ ਅਜਿਹੀਆਂ ਵਾਰਦਾਤਾਂ ਵਿੱਚ 50 ਫ਼ੀਸਦੀ ਤੋਂ ਵੱਧ ਕਮੀ ਆਈ ਹੈ।
Car Theft Gang Busted In Canada