ਜ਼ਮੀਨੀ ਵਿਵਾਦ ਦੇ ਚੱਲਦਿਆਂ ਦਿਓਰ-ਭਰਜਾਈ 'ਤੇ ਚੜ੍ਹਾਇਆ ਟਰੈਕਟਰ; ਦੋਵਾਂ ਦੀ ਮੌਤ

ਜ਼ਿਲ੍ਹੇ ਦੇ ਪਿੰਡ ਤੇਜਾ ਰੁਹੇਲਾ ਵਿੱਚ ਜ਼ਮੀਨੀ ਵਿਵਾਦ ਦੌਰਾਨ ਖੇਤ ਨੂੰ ਵਾਹੁਣ ਤੋਂ ਰੋਕਣ ਦੌਰਾਨ ਦਿਓਰ-ਭਰਜਾਈ 'ਤੇ ਟਰੈਕਟਰ ਚੜ੍ਹਾ ਦਿੱਤਾ, ਜਿਸ ਕਾਰਨ ਦੋਵਾਂ ਦੀ ਮੌਤ ਹੋ ਗਈ। ਇਸ ਮਾਮਲੇ ਵਿੱਚ ਥਾਣਾ ਸਦਰ ਫ਼ਾਜ਼ਿਲਕਾ ਪੁਲੀਸ ਨੇ ਕੁਝ ਔਰਤਾਂ ਸਮੇਤ 28 ਜਣਿਆਂ 'ਤੇ ਮਾਮਲਾ ਦਰਜ ਕੀਤਾ ਹੈ। ਥਾਣਾ ਸਦਰ ਫ਼ਾਜ਼ਿਲਕਾ ਵਿੱਚ ਦਰਜ ਐੱਫ.ਆਈ.ਆਰ. ਮੁਤਾਬਿਕ ਚੰਨਾ ਸਿੰਘ ਵਾਸੀ ਪਿੰਡ ਤੇਜਾ ਰੁਹੇਲਾ ਨੇ ਦੱਸਿਆ ਕਿ ਉਸ ਦੇ ਚਾਚਾ ਰਾਜ ਸਿੰਘ ਪਿੰਡ ਤੇਜਾ ਰੁਹੇਲਾ ਵਿਖੇ ਜ਼ਮੀਨ 'ਤੇ ਖੇਤੀ ਕਰਦੇ ਹਨ, ਪਰ ਇਹ ਜ਼ਮੀਨ ਸਰਕਾਰੀ ਹੈ। ਉਸ ਦੀ ਮਾਂ ਮਾਇਆ ਬਾਈ ਪਰਿਵਾਰ ਸਮੇਤ ਖੇਤ ਵਿੱਚ ਕੰਮ ਕਰ ਰਹੇ ਸਨ, ਜਿੱਥੇ ਸ਼ਾਮ ਦੇ ਸਮੇਂ ਭਜਨ ਸਿੰਘ ਅਤੇ ਹੋਰ ਲੋਕ ਖੇਤ ਵਿੱਚ ਆਏ ਅਤੇ ਝੋਨੇ ਦੀ ਫ਼ਸਲ ਨੂੰ ਵਾਹੁਣ ਲੱਗੇ।

ਜਦੋਂ ਉਸ ਦੀ ਮਾਤਾ ਅਤੇ ਉਸ ਦੇ ਚਾਚਾ ਨੇ ਉਕਤ ਲੋਕਾਂ ਨੂੰ ਰੋਕਿਆ ਤਾਂ ਉਕਤ ਲੋਕਾਂ ਨੇ ਉਨ੍ਹਾਂ 'ਤੇ ਟਰੈਕਟਰ ਚੜ੍ਹਾ ਦਿੱਤਾ, ਜਿਸ ਕਾਰਨ ਉਸ ਦੀ ਮਾਂ ਮਾਇਆ ਬਾਈ ਦੀ ਮੌਕੇ 'ਤੇ ਮੌਤ ਹੋ ਗਈ, ਜਦੋਂ ਕਿ ਉਸ ਦੇ ਚਾਚਾ ਦੀ ਹਸਪਤਾਲ ਵਿੱਚ ਮੌਤ ਹੋ ਗਈ।

28 ਵਿਅਕਤੀਆਂ ਵਿਰੁੱਧ ਮਾਮਲਾ ਦਰਜ

ਪੁਲੀਸ ਨੇ ਬਿਆਨ ਦੇ ਆਧਾਰ 'ਤੇ ਭਜਨ ਸਿੰਘ, ਉਸ ਦਾ ਭਰਾ ਚਿਮਨ ਸਿੰਘ, ਸਾਜਨ ਸਿੰਘ, ਸਾਹਿਲ, ਉਸ ਦੀ ਧੀ ਅਰਸ਼ਾ ਰਾਣੀ, ਰਾਜਾ ਬਾਈ, ਕ੍ਰਿਸ਼ਨਾ ਰਾਣੀ, ਸਵਰਨਾ ਬਾਈ, ਭਜਨ ਸਿੰਘ ਦੀ ਪਤਨੀ ਛਿੰਦੋ ਬਾਈ, ਹੁਸ਼ਿਆਰ ਸਿੰਘ, ਮਲਕੀਤ ਸਿੰਘ (ਸਾਰੇ ਵਾਸੀ ਪਿੰਡ ਤੇਜਾ ਰੁਹੇਲਾ), ਸੰਦੀਪ ਸਿੰਘ, ਮੰਗਾ, ਹਰਪ੍ਰੀਤ (ਵਾਸੀ ਪਿੰਡ ਮੁਹਾਰ ਸੋਨਾ), ਕਰਨੈਲ ਸਿੰਘ (ਵਾਸੀ ਪ੍ਰਭਾਤ ਵਾਲਾ ਹਿਠਾੜ), ਹੰਸਾ ਸਿੰਘ, ਜੋਗਿੰਦਰ ਸਿੰਘ (ਵਾਸੀ ਪਿੰਡ ਮੁਹਾਰ ਖੀਵਾ), ਸੁਰਜੀਤ ਸਿੰਘ (ਚੱਕ ਖੀਵਾ), ਛਿੰਦਰ ਸਿੰਘ (ਵਾਸੀ ਪਿੰਡ ਨਿਊਲਾ), ਜਸਵੰਤ ਸਿੰਘ (ਮੌਜਮ) ਅਤੇ 8 ਹੋਰ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ।

ਲਾਸ਼ਾਂ ਫ਼ਲਾਈਓਵਰ 'ਤੇ ਰੱਖ ਕੇ ਰੋਸ ਪ੍ਰਦਰਸ਼ਨ

ਉੱਧਰ ਇਸ ਮਾਮਲੇ ਵਿੱਚ ਕਿਸੇ ਵੀ ਵਿਅਕਤੀ ਦੀ ਗ੍ਰਿਫ਼ਤਾਰੀ ਨਾ ਹੋਣ ਕਾਰਨ ਪੀੜਤਾਂ ਵੱਲੋਂ ਦੋਵਾਂ ਦਿਓਰ-ਭਰਜਾਈ ਦੀਆਂ ਲਾਸ਼ਾਂ ਨੂੰ ਫ਼ਾਜ਼ਿਲਕਾ ਦੇ ਫ਼ਲਾਈਓਵਰ 'ਤੇ ਰੱਖ ਕੇ ਰੋਸ ਪ੍ਰਦਰਸ਼ਨ ਕੀਤਾ ਜਾ ਰਿਹਾ ਸੀ। ਜਿੱਥੇ ਪੀੜਤਾਂ ਨੇ ਮੰਗ ਕੀਤੀ ਕਿ ਜਲਦ ਤੋਂ ਜਲਦ ਦੋਸ਼ੀਆਂ ਦੀ ਗ੍ਰਿਫ਼ਤਾਰੀ ਕੀਤੀ ਜਾਵੇ।

tractor runs over brother in law

Recommended Posts