IND vs SA 2nd T20: ਮੁੱਲਾਂਪੁਰ 'ਚ ਅੱਜ ਟਕਰਾਅ ਦਾ ਦਿਨ - ਦੋਵੇਂ ਟੀਮਾਂ ਹੋਣਗੀਆਂ ਆਹਮੋ-ਸਾਹਮਣੇ

ਚੰਡੀਗੜ੍ਹ/ਮੁੱਲਾਂਪੁਰ, 11 ਦਸੰਬਰ 2025: ਭਾਰਤ ਅਤੇ ਦੱਖਣੀ ਅਫ਼ਰੀਕਾ ਵਿਚਕਾਰ ਚੱਲ ਰਹੀ 5 ਮੈਚਾਂ ਦੀ ਟੀ-20 ਸੀਰੀਜ਼ ਦਾ ਦੂਜਾ ਮੁਕਾਬਲਾ ਅੱਜ ਨਿਊ ਚੰਡੀਗੜ੍ਹ ਦੇ ਮਹਾਰਾਜਾ ਯਾਦਵਿੰਦਰ ਸਿੰਘ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ਵਿੱਚ ਹੋਵੇਗਾ। ਪਹਿਲੇ ਮੈਚ ਵਿੱਚ 101 ਦੌੜਾਂ ਨਾਲ ਸ਼ਾਨਦਾਰ ਜਿੱਤ ਹਾਸਲ ਕਰਨ ਤੋਂ ਬਾਅਦ ਟੀਮ ਇੰਡੀਆ ਪੂਰੇ ਆਤਮਵਿਸ਼ਵਾਸ ਨਾਲ ਮੈਦਾਨ 'ਤੇ ਉਤਰੇਗੀ, ਮਕਸਦ—ਸੀਰੀਜ਼ 'ਚ 2-0 ਦੀ ਬੜ੍ਹਤ ਬਣਾਉਣ ਦਾ।

ਇਸੇ ਦੇ ਨਾਲ, ਇਹ ਮੈਚ ਮੁੱਲਾਂਪੁਰ ਸਟੇਡੀਅਮ ਵਿੱਚ ਖੇਡਿਆ ਜਾਣ ਵਾਲਾ ਪਹਿਲਾ ਪੁਰਸ਼ ਟੀ-20 ਇੰਟਰਨੈਸ਼ਨਲ ਹੋਵੇਗਾ। ਇਸ ਇਤਿਹਾਸਕ ਮੋਕੇ ਲਈ ਸਟੇਡੀਅਮ ਅਤੇ ਇਲਾਕੇ ਵਿੱਚ ਸੁਰੱਖਿਆ ਦੇ ਕੜੇ ਪ੍ਰਬੰਧ ਕੀਤੇ ਗਏ ਹਨ।

ਯੁਵਰਾਜ ਸਿੰਘ ਅਤੇ ਹਰਮਨਪ੍ਰੀਤ ਕੌਰ ਦੇ ਨਾਂ 'ਤੇ ਸਟੈਂਡ—ਸਟੇਡੀਅਮ 'ਚ ਖਾਸ ਸਮਾਗਮ

ਅੱਜ ਦੇ ਮੈਚ ਦੌਰਾਨ ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ ਵੱਲੋਂ ਦੋ ਵੱਡੀਆਂ ਘੋਸ਼ਣਾਵਾਂ ਕੀਤੀਆਂ ਜਾਣਗੀਆਂ। ਸਟੇਡੀਅਮ ਦੇ ਦੋ ਸਟੈਂਡਾਂ ਨੂੰ 2011 ਵਰਲਡ ਕੱਪ ਦੇ ਹੀਰੋ ਯੁਵਰਾਜ ਸਿੰਘ ਅਤੇ ਭਾਰਤੀ ਮਹਿਲਾ ਟੀਮ ਦੀ ਕਪਤਾਨ ਹਰਮਨਪ੍ਰੀਤ ਕੌਰ ਦੇ ਨਾਂ ਸਮਰਪਿਤ ਕੀਤਾ ਜਾਵੇਗਾ।

ਹਰਮਨਪ੍ਰੀਤ ਕੌਰ ਉੱਤਰੀ ਭਾਰਤ ਦੀ ਪਹਿਲੀ ਅਤੇ ਦੇਸ਼ ਦੀ ਦੂਜੀ ਮਹਿਲਾ ਕ੍ਰਿਕਟਰ ਬਣੇਗੀ, ਜਿਸਦੇ ਨਾਂ 'ਤੇ ਕਿਸੇ ਸਟੇਡੀਅਮ ਵਿੱਚ ਸਟੈਂਡ ਹੋਵੇਗਾ। ਇਹ ਦੋਵੇਂ ਖਿਡਾਰੀ ਸਮਾਗਮ ਦੌਰਾਨ ਸਟੇਡੀਅਮ ਵਿੱਚ ਮੌਜੂਦ ਰਹਿਣਗੇ।

ਪੰਜਾਬ ਦੇ ਸਟਾਰ—ਗਿੱਲ ਅਤੇ ਅਭਿਸ਼ੇਕ 'ਤੇ ਖਾਸ ਧਿਆਨ

ਪੰਜਾਬ ਦੇ ਫੈਨਜ਼ ਦਾ ਧਿਆਨ ਖ਼ਾਸ ਤੌਰ 'ਤੇ ਸ਼ੁਭਮਨ ਗਿੱਲ ਅਤੇ ਅਭਿਸ਼ੇਕ ਸ਼ਰਮਾ 'ਤੇ ਹੋਵੇਗਾ। ਗਿੱਲ ਆਪਣੇ ਹੋਮ ਗਰਾਊਂਡ 'ਤੇ ਫਾਰਮ ਵਿੱਚ ਵਾਪਸ ਆਉਣ ਦੀ ਕੋਸ਼ਿਸ਼ ਕਰਨਗੇ। ਮੈਚ ਦੀ ਪੂਰਵ ਸਾਂਝ ਚੰਡੀਗੜ੍ਹ ਦੇ ਇੱਕ ਰੈਸਟੋਰੈਂਟ ਵਿੱਚ ਦੋਵਾਂ ਦਾ ਕੁਲਚੇ ਖਾਂਦੇ ਅਤੇ ਫੈਨਜ਼ ਨਾਲ ਸੈਲਫੀਆਂ ਲੈਂਦੇ ਵੀਡੀਓ ਵਾਇਰਲ ਹੋ ਰਿਹਾ ਹੈ, ਜਿਸ ਨਾਲ ਉਨ੍ਹਾਂ ਨੂੰ ਲੈ ਕੇ ਉਤਸ਼ਾਹ ਹੋਰ ਵੱਧ ਗਿਆ ਹੈ।

ਅਗਲੇ ਮੈਚ ਲਈ ਧਰਮਸ਼ਾਲਾ ਨੂੰ ਰਵਾਨਗੀ

ਦੋਵੇਂ ਟੀਮਾਂ ਕੱਲ੍ਹ ਸ਼ਾਮ ਭੁਵਨੇਸ਼ਵਰ ਤੋਂ ਚੰਡੀਗੜ੍ਹ ਪਹੁੰਚ ਚੁੱਕੀਆਂ ਸਨ। ਮੁੱਲਾਂਪੁਰ ਵਿੱਚ ਅੱਜ ਦਾ ਮੁਕਾਬਲਾ ਖੇਡਣ ਤੋਂ ਬਾਅਦ, 12 ਦਸੰਬਰ ਨੂੰ ਖਾਸ ਚਾਰਟਰ ਫਲਾਈਟ ਰਾਹੀਂ ਧਰਮਸ਼ਾਲਾ ਰਵਾਨਾ ਹੋਣਗੀਆਂ, ਜਿੱਥੇ 14 ਦਸੰਬਰ ਨੂੰ ਤੀਜਾ ਟੀ-20 ਮੈਚ ਸ਼ੇਡਿਊਲ ਹੈ।

ਚਾਹੁਣ ਵਾਲਿਆਂ ਨੂੰ ਉਮੀਦ ਹੈ ਕਿ ਟੀਮ ਇੰਡੀਆ ਅੱਜ ਵੀ ਪਹਿਲੇ ਮੈਚ ਵਾਂਗ ਜ਼ਬਰਦਸਤ ਪ੍ਰਦਰਸ਼ਨ ਕਰੇਗੀ ਅਤੇ ਸੀਰੀਜ਼ ਵਿੱਚ ਮਜ਼ਬੂਤ ਪਕੜ ਬਣਾਏਗੀ।

Powered by Froala Editor

IND Vs SA 2nd T20 Today Is The Day Of Clash In Mullanpur Both Teams Will Be Face To Face