ਕਾਂਗਰਸੀ ਆਗੂ ਦੇ ਪੁੱਤਰ ਖ਼ਿਲਾਫ਼ ਨਾਬਾਲਗ ਲੜਕੀ ਨੂੰ ਵਰਗਲਾ ਕੇ ਲਿਜਾਣ ਦਾ ਕੇਸ ਦਰਜ
ਕਾਂਗਰਸੀ ਆਗੂ ਦੇ ਪੁੱਤਰ ਖ਼ਿਲਾਫ਼ ਨਾਬਾਲਗ ਲੜਕੀ ਨੂੰ ਵਰਗਲਾ ਕੇ ਲਿਜਾਣ ਦਾ ਕੇਸ ਦਰਜ
ਸਿਆਸੀ ਹਲਕੇ ਦੇ ਇੱਕ ਸੀਨੀਅਰ ਕਾਂਗਰਸ ਆਗੂ ਦੇ ਸ਼ਾਦੀਸ਼ੁਦਾ ਪੁੱਤਰ ਨਵਜੋਤ ਸਿੰਘ
‘ਨਿੱਪੀ’ ਖ਼ਿਲਾਫ਼ ਪਰਵਾਸੀ ਪਲੰਬਰ ਦੀ ਕਰੀਬ 13-14 ਸਾਲਾ ਨਾਬਾਲਗ ਲੜਕੀ ਨੂੰ ਵਿਆਹ ਦਾ ਕਥਿਤ ਝਾਂਸਾ
ਦੇ ਕੇ ਵਰਗਲਾ-ਫੁਸਲਾ ਕੇ ਲਿਜਾਣ ਦੇ ਦੋਸ਼ ਲੱਗੇ ਹਨ। ਥਾਣਾ ਕਿੱਲਿਆਂਵਾਲੀ ਵਿਖੇ ਲੜਕੀ ਦੇ ਪਿਤਾ
ਦੀ ਸ਼ਿਕਾਇਤ ’ਤੇ ਬੀਐਨਐਸ ਦੀਆਂ ਧਾਰਾਵਾਂ 87 ਅਤੇ 137(2) ਤਹਿਤ ਕੇਸ
ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।
ਮਾਮਲਾ ਲੰਬੀ ਹਲਕੇ ਦੀ ਚੋਣ ਰਾਜਨੀਤੀ ਵਿਚ ਸਿਖਰਲੇ ਸਰਗਰਮ ਕਾਂਗਰਸ ਆਗੂ ਦੇ
ਪਰਿਵਾਰ ਨਾਲ ਜੁੜਿਆ ਹੋਣ ਕਾਰਨ ਖੇਤਰ ਵਿੱਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਉੱਧਰ, ਨਿੱਪੀ ਦੇ
ਪਿਤਾ ਗੁਰਜੰਟ ਸਿੰਘ ਬਰਾੜ ਨੇ ਦੋਸ਼ਾਂ ਨੂੰ ਸਿਰੇ ਤੋਂ ਨਕਾਰਦਿਆਂ ਕਿਹਾ ਕਿ ਉਨ੍ਹਾਂ ਦੇ ਪੁੱਤਰ ਦਾ
ਇਸ ਮਾਮਲੇ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ ਅਤੇ ਉਸ ਦੇ ਵਾਪਸ ਆਉਣ ’ਤੇ ਸਾਰੀ ਹਕੀਕਤ ਸਾਹਮਣੇ ਆ
ਜਾਵੇਗੀ।
ਘਟਨਾਕ੍ਰਮ ਅਨੁਸਾਰ ਦੋਵੇਂ ਮੰਗਲਵਾਰ ਸ਼ਾਮ ਕਰੀਬ ਤਿੰਨ-ਚਾਰ ਘੰਟਿਆਂ ਦੇ ਫਰਕ ਨਾਲ
ਸ਼ੱਕੀ ਹਾਲਾਤਾਂ ਵਿੱਚ ਲਾਪਤਾ ਹੋਏ। ਲੜਕੀ 28 ਜੁਲਾਈ ਨੂੰ ਸ਼ਾਮ ਕਰੀਬ 4 ਵਜੇ ਸਫ਼ਾਈ
ਕਰਨ ਲਈ ਘਰੋਂ ਨਿਕਲੀ ਸੀ, ਪਰ ਜਿਸ ਘਰ ਜਾਣਾ ਸੀ ਉੱਥੇ ਪੁੱਜੀ ਹੀ ਨਹੀਂ। ਉੱਧਰ, ਨਿੱਪੀ
ਸ਼ਾਮ 7 ਵਜੇ ਤੋਂ ਬਾਅਦ ਘਰੋਂ ਗਾਇਬ ਹੋਇਆ। ਦੋਵੇਂ ਪਰਿਵਾਰਾਂ ਵੱਲੋਂ ਆਪੋ-ਆਪਣੇ ਪੱਧਰ ’ਤੇ
ਭਾਲ ਕੀਤੀ ਗਈ, ਪਰ ਕੋਈ ਸੁਰਾਗ ਨਹੀਂ ਮਿਲਿਆ।
ਸ਼ਿਕਾਇਤ ਮੁਤਾਬਕ ਲੜਕੀ ਸੱਤਵੀਂ ਜਮਾਤ ਦੀ ਵਿਦਿਆਰਥਣ ਹੈ ਅਤੇ ਘਰਾਂ ਵਿੱਚ ਸਫ਼ਾਈ ਦਾ
ਕੰਮ ਕਰਦੀ ਹੈ। ਲੜਕੀ ਦੇ ਪਿਤਾ ਨੇ ਸ਼ਿਕਾਇਤ ਵਿੱਚ ਦੋਸ਼ ਲਾਇਆ ਕਿ ਨਵਜੋਤ ਨਿੱਪੀ ਉਸ ਦੀ ਨਾਬਾਲਗ
ਧੀ ਨੂੰ ਵਿਆਹ ਦਾ ਝਾਂਸਾ ਦੇ ਕੇ ਆਪਣੇ ਨਾਲ ਲੈ ਗਿਆ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਦਾ ਇੱਕ ਪੁੱਤਰ
ਨਿੱਪੀ ਦੇ ਘਰ ਸਫ਼ਾਈ ਦਾ ਕੰਮ ਕਰਦਾ ਹੈ। ਪਰਵਾਸੀ ਪਰਿਵਾਰ ਆਪਣੇ ਛੇ ਬੱਚਿਆਂ ਸਮੇਤ ਕਾਂਗਰਸੀ ਆਗੂ
ਦੇ ਘਰ ਨੇੜੇ ਇੱਕ ਸਰਮਾਏਦਾਰ ਦੇ ਖਾਲੀ ਪਲਾਟ ਵਿੱਚ ਝੁੱਗੀ ਬਣਾ ਕੇ ਰਹਿੰਦਾ ਹੈ ਅਤੇ ਲਾਪਤਾ ਲੜਕੀ
ਛੇ ਬੱਚਿਆਂ ਵਿੱਚ ਤੀਸਰੇ ਨੰਬਰ ਦੀ ਹੈ।
ਮਾਮਲਾ ਪੁਲੀਸ ਕੋਲ ਪੁੱਜਣ ਤੋਂ ਬਾਅਦ ਜਾਂਚ ਟੀਮ ਨੇ ਇਲਾਕੇ ਦੇ ਕਈ ਸੀਸੀਟੀਵੀ
ਕੈਮਰੇ ਫਰੋਲੇ। ਲੜਕੀ ਦੇ ਪਿਤਾ ਨੇ ਦਾਅਵਾ ਕੀਤਾ ਕਿ ਜਦੋਂ ਪੁਲੀਸ ਨੇ ਨਾਮਜ਼ਦ ਦੇ ਘਰ ਦੇ
ਸੀਸੀਟੀਵੀ ਦੇਖਣ ਦੀ ਗੱਲ ਕੀਤੀ ਤਾਂ ਕਥਿਤ ਤੌਰ ’ਤੇ ਕੈਮਰੇ ਖਰਾਬ ਹੋਣ ਦੀ ਗੱਲ ਆਖੀ ਗਈ।
ਪਰਿਵਾਰਕ ਸੂਤਰਾਂ ਅਨੁਸਾਰ ਬੁੱਧਵਾਰ ਨੂੰ ਨਿੱਪੀ ਨੇ ਕਿਸੇ ਹੋਰ ਦੇ ਫੋਨ ਤੋਂ ਕਈ ਜਾਣਕਾਰਾਂ ਨਾਲ
ਗੱਲ ਕੀਤੀ ਅਤੇ ਕੁਝ ਸਮੇਂ ਲਈ ਉਸ ਦਾ ਆਪਣਾ ਫੋਨ ਵੀ ਚਾਲੂ ਹੋ ਕੇ ਮੁੜ ਬੰਦ ਹੋ ਗਿਆ।
ਜਾਂਚ ਅਧਿਕਾਰੀ ਏਐਸਆਈ ਮੋਹਨ ਸਿੰਘ ਨੇ ਦੱਸਿਆ ਕਿ ਨਵਜੋਤ ਨਿੱਪੀ ਖ਼ਿਲਾਫ਼ ਬੀਐਨਐਸ
ਦੀਆਂ ਧਾਰਾਵਾਂ 87 ਅਤੇ 137(2) ਤਹਿਤ ਕੇਸ ਦਰਜ ਕਰਕੇ ਲੜਕੀ ਦੀ ਭਾਲ ਕੀਤੀ ਜਾ ਰਹੀ ਹੈ ਅਤੇ ਹਰ ਪੱਖ ਤੋਂ ਪੜਤਾਲ
ਕੀਤੀ ਜਾ ਰਹੀ ਹੈ।
Congress leaders son for luring
