ਸਪੋਕੇਨ ਦੀ ‘ਓਲਡ ਟ੍ਰੇਲਜ਼’ ਜੰਗਲੀ ਅੱਗ ਮਾਮਲੇ ਵਿੱਚ ਸ਼ੱਕੀ ਗ੍ਰਿਫ਼ਤਾਰ
ਸਪੋਕੇਨ ਦੀ ‘ਓਲਡ ਟ੍ਰੇਲਜ਼’ ਜੰਗਲੀ ਅੱਗ ਮਾਮਲੇ ਵਿੱਚ ਸ਼ੱਕੀ ਗ੍ਰਿਫ਼ਤਾਰ
ਅੱਗਜ਼ਨੀ ਦੇ ਦੋਸ਼ ਹੇਠ 37 ਸਾਲਾ ਐਰਨ ਫੈਰੀਨਾਚੀ ਕਾਬੂ – ਲੋਕਾਂ ਵੱਲੋਂ ਦਿੱਤੀ ਜਾਣਕਾਰੀ ਜਾਂਚ ਵਿੱਚ ਬਣੀ ਅਹਿਮ ਕੜੀ
ਸਪੋਕੇਨ, ਵਾਸ਼ਿੰਗਟਨ (ਪੰਜਾਬੀ ਪਹਿਚਾਣ): ਸਪੋਕੇਨ ਕਾਊਂਟੀ ਸ਼ੈਰਿਫ਼ ਦਫ਼ਤਰ ਨੇ ‘ਓਲਡ ਟ੍ਰੇਲਜ਼ ਫਾਇਰ’ ਮਾਮਲੇ ਵਿੱਚ ਵੱਡੀ ਕਾਰਵਾਈ ਕਰਦਿਆਂ 37 ਸਾਲਾ ਐਰਨ ਐੱਫ. ਫੈਰੀਨਾਚੀ (Aaron F. Farinacci) ਨੂੰ ਪਹਿਲੀ ਡਿਗਰੀ ਦੀ ਅੱਗਜ਼ਨੀ (Arson 1st Degree) ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕਰ ਲਿਆ ਹੈ।
ਇਸ ਸਬੰਧੀ ਅੱਜ ਹੋਈ ਪ੍ਰੈੱਸ ਕਾਨਫਰੰਸ ਵਿੱਚ ਸ਼ੈਰਿਫ਼ ਜੌਨ ਨੋਵਲਜ਼, ਸਪੋਕੇਨ ਵੈਲੀ ਪੁਲਿਸ ਮੁਖੀ ਡੇਵ ਐਲਿਸ ਅਤੇ ਸਪੋਕੇਨ ਕਾਊਂਟੀ ਦੇ ਪ੍ਰੋਸੀਕਿਊਟਿੰਗ ਅਟਾਰਨੀ ਪ੍ਰੈਸਟਨ ਮੈਕਕੋਲਮ ਨੇ ਜਾਂਚ ਦੀ ਜਾਣਕਾਰੀ ਸਾਂਝੀ ਕੀਤੀ।
ਸ਼ੈਰਿਫ਼ ਦਫ਼ਤਰ ਦੇ ਮੇਜਰ ਕਰਾਈਮਜ਼ ਡਿਟੈਕਟਿਵਜ਼ ਅਤੇ ਵਾਸ਼ਿੰਗਟਨ ਸਟੇਟ ਡਿਪਾਰਟਮੈਂਟ ਆਫ਼ ਨੈਚਰਲ ਰਿਸੋਰਸਜ਼ (DNR) ਦੇ ਫਾਇਰ ਇਨਵੈਸਟੀਗੇਟਰਾਂ ਨੇ ਸਾਂਝੀ ਜਾਂਚ ਦੌਰਾਨ ਸਬੂਤ ਇਕੱਠੇ ਕਰਕੇ ਫੈਰੀਨਾਚੀ ਨੂੰ ਮੁੱਖ ਸ਼ੱਕੀ ਵਜੋਂ ਚਿੰਨ੍ਹਿਤ ਕੀਤਾ। ਜਾਂਚ ਦੌਰਾਨ ਮਿਲੇ ਸਬੂਤਾਂ ਦੇ ਆਧਾਰ ’ਤੇ ਉਸ ਦੀ ਗ੍ਰਿਫ਼ਤਾਰੀ ਲਈ ਅਦਾਲਤ ਤੋਂ ਵਾਰੰਟ ਅਤੇ ਉਸ ਦੇ ਘਰ ਦੀ ਤਲਾਸ਼ੀ ਲਈ ਵੀ ਸਰਚ ਵਾਰੰਟ ਹਾਸਲ ਕੀਤਾ ਗਿਆ।
ਘਰ ’ਤੇ ਛਾਪਾ, ਬਿਨਾਂ ਕਿਸੇ ਵਿਰੋਧ ਦੇ ਗ੍ਰਿਫ਼ਤਾਰੀ
ਅੱਜ ਸਵੇਰੇ ਸਪੋਕੇਨ ਕਾਊਂਟੀ ਦੇ ਵਾਰੰਟ ਸਰਵਿਸ ਗਰੁੱਪ (SWAT ਟੀਮ ਦੇ ਮੈਂਬਰਾਂ ਦੀ ਵਿਸ਼ੇਸ਼ ਟੀਮ) ਦੀ ਮਦਦ ਨਾਲ 2800 ਬਲਾਕ, ਵੈਸਟ ਐਲੀਅਟ ਡਰਾਈਵ ਸਥਿਤ ਫੈਰੀਨਾਚੀ ਦੇ ਘਰ ’ਤੇ ਛਾਪਾ ਮਾਰਿਆ ਗਿਆ। ਇਸ ਦੌਰਾਨ ਉਸ ਨੂੰ ਬਿਨਾਂ ਕਿਸੇ ਵਿਰੋਧ ਦੇ ਗ੍ਰਿਫ਼ਤਾਰ ਕਰ ਲਿਆ ਗਿਆ।
ਬਾਅਦ ਵਿੱਚ ਉਸ ਨੂੰ ਸਪੋਕੇਨ ਕਾਊਂਟੀ ਜੇਲ੍ਹ ਵਿੱਚ ਦਾਖ਼ਲ ਕਰਵਾ ਦਿੱਤਾ ਗਿਆ, ਜਿੱਥੇ ਉਸ ’ਤੇ ਪਹਿਲੀ ਡਿਗਰੀ ਦੀ ਅੱਗਜ਼ਨੀ ਦਾ ਕੇਸ ਦਰਜ ਕੀਤਾ ਗਿਆ ਹੈ।
1 ਅਗਸਤ ਨੂੰ ਲੱਗੀ ਸੀ ‘ਓਲਡ ਟ੍ਰੇਲਜ਼’ ਅੱਗ
‘ਓਲਡ ਟ੍ਰੇਲਜ਼ ਫਾਇਰ’ ਦੀ ਪਹਿਲੀ ਸੂਚਨਾ 1 ਅਗਸਤ 2026 ਨੂੰ ਦੁਪਹਿਰ ਕਰੀਬ 12 ਵਜੇ ਮਿਲੀ ਸੀ। ਇਹ ਅੱਗ N. Old Trails Road ਅਤੇ W. Euclid Road ਦੇ ਚੌਰਾਹੇ ਨੇੜੇ, ਏਅਰਵੇ ਹਾਈਟਸ ਸ਼ਹਿਰ ਦੇ ਉੱਤਰ ਵਾਲੇ ਇਲਾਕੇ ਵਿੱਚ ਲੱਗੀ ਸੀ।
ਇਹ ਅੱਗ ਸਪੋਕੇਨ ਕਾਊਂਟੀ ਅਤੇ ਸਪੋਕੇਨ ਸ਼ਹਿਰ ਵਿੱਚ ਲੱਗੀਆਂ ਕਈ ਭਿਆਨਕ ਜੰਗਲੀ ਅੱਗਾਂ ਵਿੱਚੋਂ ਇੱਕ ਹੈ, ਜਿਨ੍ਹਾਂ ਨੇ ਸੈਂਕੜਿਆਂ ਘਰਾਂ ਅਤੇ ਇਮਾਰਤਾਂ ਨੂੰ ਤਬਾਹ ਕੀਤਾ ਅਤੇ ਹਜ਼ਾਰਾਂ ਲੋਕਾਂ ਨੂੰ ਆਪਣੇ ਘਰ ਛੱਡਣ ਲਈ ਮਜਬੂਰ ਕਰ ਦਿੱਤਾ।
ਹੋਰ ਦੋ ਅੱਗਾਂ ਦੀ ਜਾਂਚ ਵੀ ਜਾਰੀ
ਅਧਿਕਾਰੀਆਂ ਨੇ ਸਪੱਸ਼ਟ ਕੀਤਾ ਹੈ ਕਿ Autumn Lane Fire ਅਤੇ Fairview Fire ਦੇ ਕਾਰਨਾਂ ਦੀ ਜਾਂਚ ਵੀ ਅਜੇ ਜਾਰੀ ਹੈ। ਫਿਲਹਾਲ ਇਨ੍ਹਾਂ ਦੋਵੇਂ ਅੱਗਾਂ ਬਾਰੇ ਕੋਈ ਵਾਧੂ ਜਾਣਕਾਰੀ ਜਾਰੀ ਨਹੀਂ ਕੀਤੀ ਗਈ।
ਲੋਕਾਂ ਵੱਲੋਂ ਦਿੱਤੀ ਜਾਣਕਾਰੀ ਨੇ ਨਿਭਾਈ ਅਹਿਮ ਭੂਮਿਕਾ
ਸ਼ੈਰਿਫ਼ ਦਫ਼ਤਰ ਨੇ ਦੱਸਿਆ ਕਿ ਸਥਾਨਕ ਨਾਗਰਿਕਾਂ ਵੱਲੋਂ ਦਿੱਤੇ ਗਏ ਸੁਝਾਅ ਅਤੇ ਜਾਣਕਾਰੀਆਂ, ਏਅਰਵੇ ਹਾਈਟਸ ਪੁਲਿਸ ਦੇ ਅਧਿਕਾਰੀਆਂ ਅਤੇ ਘਟਨਾ ਸਥਾਨ ’ਤੇ ਸਭ ਤੋਂ ਪਹਿਲਾਂ ਪਹੁੰਚੇ ਸਪੋਕੇਨ ਕਾਊਂਟੀ ਸ਼ੈਰਿਫ਼ ਡਿਪਟੀਜ਼ ਦੀ ਕਾਰਵਾਈ ਜਾਂਚ ਲਈ ਬਹੁਤ ਮਹੱਤਵਪੂਰਨ ਸਾਬਤ ਹੋਈ। ਇਨ੍ਹਾਂ ਜਾਣਕਾਰੀਆਂ ਦੀ ਬਦੌਲਤ ਜਾਂਚਕਰਤਾ ਸ਼ੱਕੀ ਤੱਕ ਪਹੁੰਚਣ ਅਤੇ ਗ੍ਰਿਫ਼ਤਾਰੀ ਕਰਨ ਵਿੱਚ ਸਫਲ ਰਹੇ।
ਅਧਿਕਾਰੀਆਂ ਨੇ ਕਿਹਾ ਕਿ ਮਾਮਲੇ ਦੀ ਜਾਂਚ ਅਜੇ ਵੀ ਜਾਰੀ ਹੈ ਅਤੇ ਅੱਗ ਦੇ ਕਾਰਨਾਂ ਨਾਲ ਸਬੰਧਤ ਹੋਰ ਸਬੂਤ ਇਕੱਠੇ ਕੀਤੇ ਜਾ ਰਹੇ ਹਨ।
Suspect Arrested In Spokane s
