ਕੈਨੇਡਾ ‘ਚ ਸਿੱਖਾਂ ਦਾ ਵਧਿਆ ਮਾਣ, ਕਰਮਬੀਰ ਸਿੰਘ ਸਿੱਖ ਦਿੱਖ ਬਰਕਰਾਰ ਰੱਖਦੇ ਬਣੇ ਪਹਿਲੇ ਸਿੱਖ ਮਰੀਨ ਇੰਜੀਨੀਅਰ

ਬੀ.ਸੀ. ਫੈਰੀਜ਼ ਨੇ ਅਪਣੀ ਕਲੀਨ-ਸ਼ੇਵ ਨੀਤੀ ਵਿਚ ਵੱਡਾ ਬਦਲਾਅ ਕਰਦਿਆਂ ਸਿੱਖ ਕਰਮਚਾਰੀਆਂ ਲਈ ਅਹਿਮ ਅਹੁਦਿਆਂ ਦੇ ਦਰਵਾਜ਼ੇ ਖੋਲ੍ਹ ਦਿਤੇ ਹਨ। ਹੁਣ ਦਾਹੜੀ ਰੱਖਣ ਵਾਲੇ ਸਿੱਖ ਅਧਿਕਾਰੀ ਵੀ ਡੈੱਕ ਅਫਸਰ, ਮੁੱਖ ਇੰਜੀਨੀਅਰ ਅਤੇ ਪਹਿਲੇ ਇੰਜੀਨੀਅਰ ਵਰਗੀਆਂ ਭੂਮਿਕਾਵਾਂ ਨਿਭਾ ਸਕਣਗੇ। ਪਹਿਲਾਂ, ਐੱਸ.ਸੀ.ਬੀ.ਏ. (ਸਾਹ ਲੈਣ ਵਾਲੇ ਉਪਕਰਣ) ਨੀਤੀਆਂ ਕਾਰਨ ‘‘ਨੋ ਸ਼ੇਵ, ਨੋ ਸ਼ਿਫਟ’’ ਪਾਲਿਸੀ ਲਾਗੂ ਸੀ, ਜਿਸ ਨਾਲ ਯੋਗ ਸਿੱਖ ਕਰਮਚਾਰੀਆਂ ਨੂੰ ਸਿਰਫ਼ ਧਾਰਮਕ ਪਾਲਣਾ ਦੇ ਆਧਾਰ ’ਤੇ ਰੁਜ਼ਗਾਰ ਤੋਂ ਵਾਂਝਾ ਕੀਤਾ ਜਾ ਰਿਹਾ ਸੀ।

ਇਸ ਫ਼ੈਸਲੇ ਨਾਲ ਕਰਮਬੀਰ ਸਿੰਘ ਬੀ.ਸੀ. ਫੈਰੀਜ਼ ਵਿਚ ਅਹੁਦਾ ਹਾਸਲ ਕਰਨ ਵਾਲਾ ਪਹਿਲਾ ਸਿੱਖ ਮਰੀਨ ਇੰਜੀਨੀਅਰ ਬਣ ਗਿਆ ਹੈ। ਉਸ ਨੇ ਕਿਹਾ, ‘‘ਮੇਰੇ ਕੋਲ ਲੋੜੀਂਦੇ ਪ੍ਰਮਾਣ ਸਨ ਪਰ ਹਰ ਵਾਰ ਮੈਨੂੰ ਕਿਹਾ ਜਾਂਦਾ ਸੀ ਕਿ ਮੈਨੂੰ ਕਲੀਨ-ਸ਼ੇਵ ਕਰਨਾ ਪਵੇਗਾ। ਇਹ ਮੇਰੇ ਅਕੀਦੇ ਕਾਰਨ ਸੰਭਵ ਨਹੀਂ ਸੀ। ਹੁਣ ਇਹ ਇਕ ਮਾਣ ਵਾਲਾ ਪਲ ਹੈ।’’ ਕਰਮਬੀਰ ਸਿੰਘ ਗੁਰਦਾਸਪੁਰ ਜ਼ਿਲ੍ਹੇ ਦੇ ਧਾਰੀਵਾਲ ਕਸਬੇ ਦੇ ਕੰਗ ਪਿੰਡ ਨਾਲ ਸੰਬੰਧਤ ਹੈ।

ਇਸੇ ਤਰ੍ਹਾਂ, ਗੁਰਪ੍ਰੀਤ ਸਿੰਘ ਬਾਜਵਾ ਬੀ.ਸੀ. ਫੈਰੀਜ਼ ਦਾ ਪਹਿਲਾ ਦਸਤਾਰਧਾਰੀ ਡੈੱਕ ਅਫਸਰ ਅਤੇ ਕੈਪਟਨ ਬਣਿਆ ਹੈ। ਉਸ ਨੇ ਯੂਨੀਅਨ ਵਰਕਰਾਂ ਦੀ ਨੁਮਾਇੰਦਗੀ ਕਰਦਿਆਂ ਨੀਤੀ ਦੇ ਵਿਕਲਪਾਂ ਦੀ ਵਕਾਲਤ ਕੀਤੀ। ਵਿਸ਼ਵ ਸਿੱਖ ਸੰਗਠਨ ਦੇ ਪ੍ਰਧਾਨ ਦਾਨਿਸ਼ ਸਿੰਘ ਨੇ ਕਿਹਾ, ‘‘ਲੰਮੇ ਸਮੇਂ ਤੋਂ ਸਿੱਖ ਕਰਮਚਾਰੀਆਂ ਨੂੰ ਅਪਣੇ ਵਿਸ਼ਵਾਸ ਅਤੇ ਕਰੀਅਰ ’ਚੋਂ ਇਕ ਦੀ ਚੋਣ ਕਰਨੀ ਪੈਂਦੀ ਸੀ।

ਇਹ ਬਿ੍ਰਟਿਸ਼ ਕੋਲੰਬੀਆ ਵਿਚ ਸਮਾਨਤਾ ਵਲ ਮਹੱਤਵਪੂਰਨ ਕਦਮ ਹੈ।’’ ਬੀਸੀ ਫੈਰੀਜ਼ ਨੇ ਕਿਹਾ ਕਿ ਇਹ ਫ਼ੈਸਲਾ ਉਨ੍ਹਾਂ ਕਰਮਚਾਰੀਆਂ ਲਈ ਸਕਾਰਾਤਮਕ ਪ੍ਰਭਾਵ ਲਿਆਵੇਗਾ ਜੋ ਧਾਰਮਕ ਜਾਂ ਨਿੱਜੀ ਕਾਰਨਾਂ ਕਰ ਕੇ ਦਾੜ੍ਹੀ ਰਖਦੇ ਹਨ ਪਰ ਸੁਰੱਖਿਆ ਦੇ ਉੱਚ ਮਿਆਰ ਨੂੰ ਬਣਾਈ ਰਖਦੇ ਹਨ।

First sikh marine engineer

Recommended Posts