ਫਰਾਂਸ ਦੇ ਸੈਂਕੜੇ ਸੁਪਰਮਾਰਕੀਟਾਂ ’ਤੇ ਸਾਈਬਰ ਹਮਲਾ; ਲੱਖਾਂ ਯੂਰੋ ਦਾ ਖਾਣ-ਪੀਣ ਦਾ ਸਾਮਾਨ ਬਰਬਾਦ
Punjabi Pehchan / France
ਫਰਿੱਜਾਂ ਦਾ ਤਾਪਮਾਨ 50 ਡਿਗਰੀ ਤੱਕ ਪਹੁੰਚਿਆ, ਤਾਜ਼ਾ ਰਿਪੋਰਟਾਂ ਵਿੱਚ ਕਰੀਬ 700 ਸਟੋਰ ਪ੍ਰਭਾਵਿਤ
ਪੈਰਿਸ, 14 ਅਕਤੂਬਰ — ਫਰਾਂਸ ਵਿੱਚ ਸੁਪਰਮਾਰਕੀਟਾਂ ਦੇ ਫਰਿੱਜਾਂ ਅਤੇ ਫ੍ਰੀਜ਼ਰਾਂ ਨੂੰ ਨਿਸ਼ਾਨਾ ਬਣਾਉਣ ਵਾਲੇ ਵੱਡੇ ਸਾਈਬਰ ਹਮਲੇ ਕਾਰਨ ਭਾਰੀ ਮਾਤਰਾ ਵਿੱਚ ਖਾਣ-ਪੀਣ ਦਾ ਸਾਮਾਨ ਬਰਬਾਦ ਹੋ ਗਿਆ। ਮੁੱਢਲੀਆਂ ਰਿਪੋਰਟਾਂ ਵਿੱਚ ਕਰੀਬ 400 ਸਟੋਰ ਪ੍ਰਭਾਵਿਤ ਦੱਸੇ ਗਏ ਸਨ, ਜਦਕਿ ਤਾਜ਼ਾ ਰਿਪੋਰਟਾਂ ਮੁਤਾਬਕ ਇਹ ਗਿਣਤੀ ਲਗਭਗ 700 ਹੋ ਗਈ ਹੈ।
11 ਅਤੇ 12 ਅਕਤੂਬਰ ਦੀ ਦਰਮਿਆਨੀ ਰਾਤ ਹਮਲਾਵਰਾਂ ਨੇ ਠੰਢਕ ਪ੍ਰਣਾਲੀਆਂ ’ਤੇ ਦੂਰੋਂ ਕਾਬੂ ਕਰਕੇ ਤਾਪਮਾਨ ਵਧਾ ਦਿੱਤਾ। ਕੁਝ ਸਟੋਰਾਂ ਵਿੱਚ ਤਾਪਮਾਨ 50 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਗਿਆ। ਪ੍ਰਭਾਵਿਤ ਕਾਰੋਬਾਰਾਂ ਵਿੱਚ ਇੰਟਰਮਾਰਸ਼ੇ, ਕੈਰਫੂਰ, ਮੋਨੋਪ੍ਰੀ ਅਤੇ ਕੋਆਪਰੇਟਿਵ ਯੂ ਵਰਗੀਆਂ ਪ੍ਰਮੁੱਖ ਸੁਪਰਮਾਰਕੀਟ ਲੜੀਆਂ ਸ਼ਾਮਲ ਹਨ। ਕੁਝ ਥਾਵਾਂ ’ਤੇ ਅੱਗ ਲੱਗਣ ਦੀਆਂ ਘਟਨਾਵਾਂ ਵੀ ਸਾਹਮਣੇ ਆਈਆਂ।
ਗਾਹਕਾਂ ਦੀ ਸਿਹਤ ਨੂੰ ਖ਼ਤਰੇ ਤੋਂ ਬਚਾਉਣ ਲਈ ਪ੍ਰਭਾਵਿਤ ਖੁਰਾਕ ਵਿਕਰੀ ਤੋਂ ਹਟਾ ਕੇ ਨਸ਼ਟ ਕਰਨੀ ਪਈ। ਕਾਰੋਬਾਰੀਆਂ ਨੇ ਨੁਕਸਾਨ ਲੱਖਾਂ ਯੂਰੋ ਵਿੱਚ ਹੋਣ ਦਾ ਅੰਦਾਜ਼ਾ ਲਾਇਆ ਹੈ, ਪਰ ਦੇਸ਼ ਭਰ ਦੇ ਕੁੱਲ ਨੁਕਸਾਨ ਦਾ ਅੰਤਿਮ ਅੰਕੜਾ ਅਜੇ ਸਾਹਮਣੇ ਨਹੀਂ ਆਇਆ।
ਫਰਾਂਸ ਦੀ ਕੌਮੀ ਸਾਈਬਰ ਸੁਰੱਖਿਆ ਏਜੰਸੀ ਨੇ ਚੇਤਾਵਨੀ ਦਿੱਤੀ ਹੈ ਕਿ ਹਮਲੇ ਅਜੇ ਵੀ ਜਾਰੀ ਹੋ ਸਕਦੇ ਹਨ। ਸਟੋਰਾਂ ਨੂੰ ਸੁਰੱਖਿਅਤ ਨੈੱਟਵਰਕ ਵਰਤਣ, ਪ੍ਰਣਾਲੀਆਂ ਅੱਪਡੇਟ ਕਰਨ ਅਤੇ ਪਾਸਵਰਡ ਬਦਲਣ ਦੀ ਸਲਾਹ ਦਿੱਤੀ ਗਈ ਹੈ। ਹਮਲਾਵਰਾਂ ਦੀ ਪਛਾਣ ਅਤੇ ਮਕਸਦ ਬਾਰੇ ਜਾਂਚ ਜਾਰੀ ਹੈ।
France supermarket cyberattack food loss
