ਮੈਕਸੀਕੋ ਦੌਰੇ ਦੌਰਾਨ ਬਿਮਾਰ ਹੋਏ ਕੈਨੇਡੀਅਨ ਨੂੰ 1.47 ਲੱਖ ਡਾਲਰ ਦਾ ਮੈਡੀਕਲ ਬਿੱਲ, ਬੀਮਾ ਕੰਪਨੀ ਨੇ ਦਾਅਵਾ ਕੀਤਾ ਰੱਦ
ਮੈਕਸੀਕੋ ਦੌਰੇ ਦੌਰਾਨ ਬਿਮਾਰ ਹੋਏ ਕੈਨੇਡੀਅਨ ਨੂੰ 1.47 ਲੱਖ ਡਾਲਰ ਦਾ ਮੈਡੀਕਲ ਬਿੱਲ, ਬੀਮਾ ਕੰਪਨੀ ਨੇ ਦਾਅਵਾ ਕੀਤਾ ਰੱਦ
ਓਨਟਾਰੀਓ , ਕਨੈਡਾ (ਪੰਜਾਬੀ ਪਹਿਚਾਣ)ਓਨਟਾਰੀਓ ਦੇ ਰਹਿਣ ਵਾਲੇ ਇਕ ਵਿਅਕਤੀ ਨੂੰ ਮੈਕਸੀਕੋ
ਵਿੱਚ ਛੁੱਟੀਆਂ ਮਨਾਉਣ ਦੌਰਾਨ ਗੰਭੀਰ ਤੌਰ ’ਤੇ ਬਿਮਾਰ ਹੋਣ ਤੋਂ ਬਾਅਦ 1,47,502 ਡਾਲਰ ਦਾ
ਮੈਡੀਕਲ ਬਿੱਲ ਭਰਨ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਬੀਮਾ ਕੰਪਨੀ ਵੱਲੋਂ ਉਸ ਦਾ ਯਾਤਰਾ ਬੀਮਾ
ਦਾਅਵਾ ਰੱਦ ਕਰ ਦਿੱਤਾ ਗਿਆ ਹੈ।
ਓਸ਼ਾਵਾ ਨਿਵਾਸੀ ਬਹੋਜ਼ ਅਲੀ ਅਪ੍ਰੈਲ 2024 ਵਿੱਚ ਆਪਣੀ ਸਾਥੀ ਨਾਲ ਮੈਕਸੀਕੋ ਦੇ
ਕੈਨਕੂਨ ਸ਼ਹਿਰ ਵਿੱਚ ਛੁੱਟੀਆਂ ਮਨਾਉਣ ਗਿਆ ਸੀ। ਯਾਤਰਾ ਤੋਂ ਪਹਿਲਾਂ ਉਸ ਨੇ ਮੈਨੂਲਾਈਫ ਕੰਪਨੀ
ਤੋਂ ਯਾਤਰਾ ਬੀਮਾ ਵੀ ਖਰੀਦਿਆ ਸੀ।
ਅਲੀ ਨੇ ਦੱਸਿਆ ਕਿ ਰਵਾਨਗੀ ਤੋਂ ਲਗਭਗ ਇੱਕ ਹਫ਼ਤਾ ਪਹਿਲਾਂ ਉਹ ਆਪਣੀ ਤਬੀਅਤ
ਖ਼ਰਾਬ ਹੋਣ ਕਾਰਨ ਇੱਕ ਕਲੀਨਿਕ ਵਿੱਚ ਗਿਆ ਸੀ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਆਮ ਬਿਮਾਰੀ ਦੱਸਦੇ
ਹੋਏ ਯਾਤਰਾ ਕਰਨ ਲਈ ਯੋਗ ਕਰਾਰ ਦਿੱਤਾ ਸੀ।
ਪਰ ਮੈਕਸੀਕੋ ਪਹੁੰਚਣ ਤੋਂ ਕੁਝ ਦਿਨਾਂ ਬਾਅਦ ਉਸ ਦੀ ਸਿਹਤ ਅਚਾਨਕ ਵਿਗੜ ਗਈ। ਉਸ
ਨੂੰ ਕਈ ਦੌਰੇ (ਸੀਜ਼ਰ) ਪਏ ਅਤੇ ਐਮਰਜੈਂਸੀ ਹਾਲਤ ਵਿੱਚ ਹਸਪਤਾਲ ਦਾਖਲ ਕਰਵਾਇਆ ਗਿਆ। ਬਾਅਦ ਵਿੱਚ
ਉਹ ਕੋਮਾ ਵਿੱਚ ਚਲਾ ਗਿਆ।
ਅਲੀ ਦਾ ਮੈਕਸੀਕੋ ਵਿੱਚ ਅੱਠ ਦਿਨ ਇਲਾਜ ਕੀਤਾ ਗਿਆ ਅਤੇ ਹਾਲਤ ਸਥਿਰ ਹੋਣ ਉਪਰੰਤ
ਏਅਰ ਐਂਬੂਲੈਂਸ ਰਾਹੀਂ ਕੈਨੇਡਾ ਲਿਆਂਦਾ ਗਿਆ। ਸ਼ੁਰੂਆਤ ਵਿੱਚ ਉਸ ਦੇ ਇਲਾਜ ਦਾ ਖਰਚਾ ਬੀਮਾ
ਕੰਪਨੀ ਵੱਲੋਂ ਭਰਿਆ ਗਿਆ ਸੀ।
ਹਾਲਾਂਕਿ, ਇੱਕ ਸਾਲ ਤੋਂ ਵੱਧ ਸਮੇਂ ਬਾਅਦ ਉਸ ਨੂੰ ਸੂਚਿਤ ਕੀਤਾ ਗਿਆ ਕਿ ਉਸ ਦਾ ਬੀਮਾ ਦਾਅਵਾ
ਰੱਦ ਕਰ ਦਿੱਤਾ ਗਿਆ ਹੈ ਅਤੇ ਹੁਣ ਉਸ ਨੂੰ 1,47,502 ਡਾਲਰ ਦੀ ਪੂਰੀ ਰਕਮ ਵਾਪਸ ਅਦਾ ਕਰਨੀ
ਪਵੇਗੀ।
ਬੀਮਾ ਕੰਪਨੀ ਮੈਨੂਲਾਈਫ ਦਾ ਕਹਿਣਾ ਹੈ ਕਿ ਪਾਲਿਸੀ ਵਿੱਚ ਦਰਜ “ਸਥਿਰਤਾ ਮਿਆਦ” (Stability
Period) ਦੀ ਸ਼ਰਤ ਮੁਤਾਬਕ ਯਾਤਰਾ ਤੋਂ ਪਹਿਲਾਂ 90 ਦਿਨਾਂ ਤੱਕ ਸਿਹਤ ਸਥਿਰ ਹੋਣੀ ਲਾਜ਼ਮੀ
ਸੀ। ਕੰਪਨੀ ਅਨੁਸਾਰ ਅਲੀ ਨੇ ਯਾਤਰਾ ਤੋਂ ਪਹਿਲਾਂ ਸੰਬੰਧਿਤ ਲੱਛਣਾਂ ਕਾਰਨ ਡਾਕਟਰੀ ਸਲਾਹ ਲਈ ਸੀ,
ਜਿਸ ਕਰਕੇ ਉਸ ਦੀ ਹਾਲਤ ਇਸ ਸ਼ਰਤ ਦੇ ਅਧੀਨ ਆਉਂਦੀ ਹੈ।
ਅਲੀ ਅਤੇ ਉਸ ਦੇ ਪਰਿਵਾਰ ਵੱਲੋਂ ਦੋ ਵਾਰ ਅਪੀਲ ਕੀਤੀ ਗਈ, ਪਰ ਦੋਵੇਂ
ਅਪੀਲਾਂ ਰੱਦ ਹੋ ਗਈਆਂ।
ਟ੍ਰੈਵਲ ਇੰਸ਼ੋਰੈਂਸ ਮਾਹਿਰ ਮਾਰਟਿਨ ਫਾਇਰਸਟੋਨ ਨੇ ਕਿਹਾ ਕਿ ਇਹ ਮਾਮਲਾ ਯਾਤਰਾ
ਬੀਮਾ ਪਾਲਿਸੀਆਂ ਦੀਆਂ ਜਟਿਲ ਸ਼ਰਤਾਂ ਨੂੰ ਉਜਾਗਰ ਕਰਦਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਦੁਖਦਾਈ
ਸਥਿਤੀ ਹੈ ਕਿਉਂਕਿ ਮੈਡੀਕਲ ਖਰਚੇ ਦੀ ਰਕਮ ਬਹੁਤ ਵੱਡੀ ਹੈ।
ਅਲੀ ਦੇ ਪਿਤਾ ਰਹੀਮ ਅਲੀ ਨੇ ਕਿਹਾ ਕਿ ਇਸ ਘਟਨਾ ਨੇ ਪਰਿਵਾਰ ਨੂੰ ਯਾਤਰਾ ਬੀਮੇ ਦੀ
ਭਰੋਸੇਯੋਗਤਾ ਬਾਰੇ ਚਿੰਤਤ ਕਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਜਦੋਂ ਲੋਕਾਂ ਨੂੰ ਸਭ ਤੋਂ ਵੱਧ ਲੋੜ
ਹੁੰਦੀ ਹੈ, ਤਾਂ ਕਈ ਵਾਰ ਬੀਮਾ ਕੰਪਨੀਆਂ ਦਾਅਵੇ ਰੱਦ ਕਰਨ ਦੇ ਕਾਰਨ ਲੱਭ ਲੈਂਦੀਆਂ ਹਨ।
ਇਸ ਘਟਨਾ ਤੋਂ ਬਾਅਦ ਯਾਤਰਾ ਕਰਨ ਵਾਲੇ ਕੈਨੇਡੀਅਨਾਂ ਨੂੰ ਬੀਮਾ ਪਾਲਿਸੀਆਂ ਦੀਆਂ
ਸ਼ਰਤਾਂ ਅਤੇ ਮੈਡੀਕਲ ਘੋਸ਼ਣਾਵਾਂ ਨੂੰ ਧਿਆਨ ਨਾਲ ਸਮਝਣ ਦੀ ਸਲਾਹ ਦਿੱਤੀ ਜਾ ਰਹੀ ਹੈ।
Medical Bill In Mexico Insurance Claim Denied
